naya janm

abhī ik saal guzrā hai yahī mausam yahī din the

magar maiñ apne kamre meñ bahut afsurda baiThā thā

na koī sāñvle mahbūb kī yādoñ kā afsāna

na aivān-e-zamistāñ kī taraf jaane kī kuchh ḳhvāhish

kisī ne haal pūchhā to bahut hī be-niyāzī se

kahā jī haañ ḳhudā kā shukr hai maiñ ḳhairiyat se huuñ

koī ye pūchhtā kyuuñ aaj kal koī ġhazal likkhī

na jaane baat kyā hai in dinoñ kuchh aisā lagtā hai

tumhārī har ġhazal meñ miir kā andāz miltā hai

har ik misre se jaise dhīmī dhīmī aañch uThtī hai

tumhāre sher paḌh kar jaane kyuuñ mahsūs hotā hai

ki koī saaz par maddham suroñ meñ gungunātā hai

magar ik baat pūchhūñ tum ḳhafā to ho na jāoge

ye āḳhir kyā sabab hai aaj kal nazmeñ nahīñ likhte

tumhārī āp-bītī bhī abhī tak nā-mukammal hai

ise to nāqidān-e-fan ne sunte hī sarāhā hai

maiñ sab suntā magar ye dil hī dil meñ sochtā rahtā

mire ahbāb kyā jāneñ ki mujh par kyā guzartī hai

mire afkār pe ye kaisī vīrānī sī chhā.ī hai

bahut kuchh sochtā huuñ phir bhī ab sochā nahīñ jaatā

bahut kuchh chāhtā huuñ phir bhī koī bas nahīñ chaltā

magar is bebasī meñ bhī mire dil kī ye hālat thī

kabhī jab koī achchhī chiiz paḌhne ke liye miltī

to pahroñ ruuh par ik vajd kī sī kaifiyat hotī

ragoñ meñ merī jaise ḳhuuñ kī gardish tez ho jaatī

lahū kā ek ik qatra ye kahtā maiñ to zinda huuñ

mirī pāmāliyoñ meñ pal rahī hai ik tavānā.ī

yahī aalam rahā to jaane maiñ kis roz uTh baiThūñ

basant aayā to yuuñ aayā ki maiñ bhī jaise uTh baiThā

saverā hote hī har samt se jhoñke havāoñ ke

na.ī ḳhushbū liye mujh ko jagāne ke liye aa.e

jidhar bhī aañkh uThātā huuñ shafaq kī muskurāhaT hai

vahī sūraj hai lekin aur hī kuchh jagmagāhaT hai

na jaane kaise kaise phuul ab mujh ko bulāte haiñ

na jaane kitne kitne rañg se dil ko lubhāte haiñ

fazā meñ duur tak phaile hue vo khet sarsoñ ke

ye kahte haiñ ki ab armāñ nikālo apne barsoñ ke

tumhāre sāmne phailā huā maidān saarā hai

koī āvāz detā hai ki aao tum hamāre ho

mirī dhartī ke beTe merī duniyā ke dulāre ho

tumhārī aañkh meñ jo ḳhvāb so.e haiñ vo mere haiñ

tumhāre ashk ne jo biij bo.e haiñ vo mere haiñ

isī vaadī meñ phir se lauT kar ab tum ko aanā hai

tumhārī hī ye bastī hai tumhīñ ko phir basānā hai

ab is bastī meñ rakhte hī qadam kuchh aisā lagtā hai

ki is kā zarra zarra patta patta kuchh nayā sā hai

har ik raste pe jaise kuchh na.e chehre se milte haiñ

yahī jī chāhtā hai jo mile ab us se ye pūchheñ

tumhārā naam kyā hai? tum kahāñ ke rahne vaale ho

kuchh aisā jaan paḌtā hai ki pahle bhī mile haiñ ham

rahe haiñ saath yā ik dūsre ko jānte haiñ ham

agar tum saath the to tum bhī shāyad dost the mere

mujhe yaad aayā donoñ saath hī college meñ paḌhte the

vo saare dostoñ kā jam.a honā mere kamre meñ

vo gap shap qahqahe vo apne apne ishq ke qisse

vo mīras road kī bāteñ vo charche ḳhūb-rūyoñ ke

kabhī āvāragardī apnī un vīrān saḌkoñ kī

kabhī bātoñ meñ rāteñ kāTnā sunsān jāḌoñ kī

kabhī vo chāndnī meñ apnā yuuñ hī ghūmte rahnā

kabhī vo chaa.e kī mezoñ pe ghanToñ baiThnā sab kā

vo bāteñ ilm-o-hikmat kī kabhī shikve-shikāyat kī

tumheñ to yaad hogā un meñ hī ik dost shā.ir thā

zarā dekho to mujh ko ġhaur se shāyad vo maiñ hī thā

bahut din meñ mile haiñ ham to aao aaj jī bhar kar

hañseñ boleñ kahīñ āvāragardī ke liye nikleñ

chaleñ aur chal ke saare dostoñ ko phir bulā laa.eñ

sajā.eñ aaj phir mahfil kahīñ piine pilāne kī

maiñ tum ko aaj apnī kuchh na.ī bāteñ batā.ūñgā

maiñ tum ko aaj apnī kuchh na.ī nazmeñ sunā.ūñgā

abhi ek sal guzra hai yahi mausam yahi din the

magar main apne kamre mein bahut afsurda baiTha tha

na koi sanwle mahbub ki yaadon ka afsana

na aiwan-e-zamistan ki taraf jaane ki kuchh KHwahish

kisi ne haal puchha to bahut hi be-niyazi se

kaha ji han KHuda ka shukr hai main KHairiyat se hun

koi ye puchhta kyun aaj kal koi ghazal likkhi

na jaane baat kya hai in dinon kuchh aisa lagta hai

tumhaari har ghazal mein mir ka andaz milta hai

har ek misre se jaise dhimi dhimi aanch uThti hai

tumhaare sher paDh kar jaane kyun mahsus hota hai

ki koi saz par maddham suron mein gungunata hai

magar ek baat puchhun tum KHafa to ho na jaoge

ye aaKHir kya sabab hai aaj kal nazmen nahin likhte

tumhaari aap-biti bhi abhi tak na-mukammal hai

ise to naqidan-e-fan ne sunte hi saraha hai

main sab sunta magar ye dil hi dil mein sochta rahta

mere ahbab kya jaanen ki mujh par kya guzarti hai

mere afkar pe ye kaisi virani si chhai hai

bahut kuchh sochta hun phir bhi ab socha nahin jata

bahut kuchh chahta hun phir bhi koi bas nahin chalta

magar is bebasi mein bhi mere dil ki ye haalat thi

kabhi jab koi achchhi chiz paDhne ke liye milti

to pahron ruh par ek wajd ki si kaifiyat hoti

ragon mein meri jaise KHun ki gardish tez ho jati

lahu ka ek ek qatra ye kahta main to zinda hun

meri pamaliyon mein pal rahi hai ek tawanai

yahi aalam raha to jaane main kis roz uTh baiThun

basant aaya to yun aaya ki main bhi jaise uTh baiTha

sawera hote hi har samt se jhonke hawaon ke

nai KHushbu liye mujh ko jagane ke liye aae

jidhar bhi aankh uThata hun shafaq ki muskurahaT hai

wahi suraj hai lekin aur hi kuchh jagmagahaT hai

na jaane kaise kaise phul ab mujh ko bulate hain

na jaane kitne kitne rang se dil ko lubhate hain

faza mein dur tak phaile hue wo khet sarson ke

ye kahte hain ki ab arman nikalo apne barson ke

tumhaare samne phaila hua maidan sara hai

koi aawaz deta hai ki aao tum hamare ho

meri dharti ke beTe meri duniya ke dulare ho

tumhaari aankh mein jo KHwab soe hain wo mere hain

tumhaare ashk ne jo bij boe hain wo mere hain

isi wadi mein phir se lauT kar ab tum ko aana hai

tumhaari hi ye basti hai tumhin ko phir basana hai

ab is basti mein rakhte hi qadam kuchh aisa lagta hai

ki is ka zarra zarra patta patta kuchh naya sa hai

har ek raste pe jaise kuchh nae chehre se milte hain

yahi ji chahta hai jo mile ab us se ye puchhen

tumhaara nam kya hai? tum kahan ke rahne wale ho

kuchh aisa jaan paDta hai ki pahle bhi mile hain hum

rahe hain sath ya ek dusre ko jaante hain hum

agar tum sath the to tum bhi shayad dost the mere

mujhe yaad aaya donon sath hi college mein paDhte the

wo sare doston ka jama hona mere kamre mein

wo gap shap qahqahe wo apne apne ishq ke qisse

wo miras road ki baaten wo charche KHub-ruyon ke

kabhi aawaragardi apni un viran saDkon ki

kabhi baaton mein raaten kaTna sunsan jaDon ki

kabhi wo chandni mein apna yun hi ghumte rahna

kabhi wo chae ki mezon pe ghanTon baiThna sab ka

wo baaten ilm-o-hikmat ki kabhi shikwe-shikayat ki

tumhein to yaad hoga un mein hi ek dost shair tha

zara dekho to mujh ko ghaur se shayad wo main hi tha

bahut din mein mile hain hum to aao aaj ji bhar kar

hansen bolen kahin aawaragardi ke liye niklen

chalen aur chal ke sare doston ko phir bula laen

sajaen aaj phir mahfil kahin pine pilane ki

main tum ko aaj apni kuchh nai baaten bataunga

main tum ko aaj apni kuchh nai nazmen sunaunga