naya safar

ta.alluqāt kā afsūñ kudūratoñ kā ġhubār

diloñ kā buġhz, mohabbat ke dā.eroñ kā hisār

masarratoñ kā har ik rañg, ġham kā har lamha

guzartī mauj ke mānind ubhar ke Duub gayā

ḳhulūs o mahr o adāvat kī saarī zanjīreñ

palak jhapakne kī mohlat meñ jal ke raakh huiiñ

na kaTne vaale kaThin din ḳhayāl o ḳhvāb hue

na aane vaale jo din the vo aa ke biit ga.e

ġham-e-firāq shab-e-intizār sub.h-e-visāl

bas ek gard-e-zamāna muhīt hai sab par

ye sub.h-e-nau hai ki shām-e-hayāt kī manzil

ye iḳhtitām-e-safar hai ki ibtidā-e-safar

talluqat ka afsun kuduraton ka ghubar

dilon ka bughz, mohabbat ke daeron ka hisar

masarraton ka har ek rang, gham ka har lamha

guzarti mauj ke manind ubhar ke Dub gaya

KHulus o mahr o adawat ki sari zanjiren

palak jhapakne ki mohlat mein jal ke rakh huin

na kaTne wale kaThin din KHayal o KHwab hue

na aane wale jo din the wo aa ke bit gae

gham-e-firaq shab-e-intizar subh-e-visal

bas ek gard-e-zamana muhit hai sab par

ye subh-e-nau hai ki sham-e-hayat ki manzil

ye iKHtitam-e-safar hai ki ibtida-e-safar