naya sal

na.e saal kī yuuñ ḳhushī ham manā.eñ

ki rūThe huoñ ko gale se lagā.eñ

ga.e saal ke saare ġham bhuul jaa.eñ

nayā saal aayā na.e gul khilā.eñ

sitāroñ se dhartī kā dāman sajā.eñ

nazāroñ ko tasvīr-e-jannat banā.eñ

rahe raaj dhartī pe ab shāntī kā

na chhā.eñ kahīñ jang kī ab ghaTā.eñ

miTānā hai ham ko kudūrat diloñ se

har ik samt se aa.eñ bas ye sadā.eñ

hamīñ pāsbāñ kal baneñge vatan ke

kareñ ahd jo bhī vo kar ke dikhā.eñ

nayā saal yā rab mubārak ho sab ko

na.e roz-o-shab sab ko hī raas aa.eñ

na.e saal kī yuuñ kareñ peshvā.ī

ġhamoñ ko bhulā kar faqat muskurā.eñ

isī gulsitāñ ke haiñ sab phuul 'jauhar'

khileñ muskurā.eñ hañseñ aur hañsā.eñ

nae sal ki yun KHushi hum manaen

ki ruThe huon ko gale se lagaen

gae sal ke sare gham bhul jaen

naya sal aaya nae gul khilaen

sitaron se dharti ka daman sajaen

nazaron ko taswir-e-jannat banaen

rahe raj dharti pe ab shanti ka

na chhaen kahin jang ki ab ghaTaen

miTana hai hum ko kudurat dilon se

har ek samt se aaen bas ye sadaen

hamin pasban kal banenge watan ke

karen ahd jo bhi wo kar ke dikhaen

naya sal ya rab mubarak ho sab ko

nae roz-o-shab sab ko hi ras aaen

nae sal ki yun karen peshwai

ghamon ko bhula kar faqat muskuraen

isi gulsitan ke hain sab phul 'jauhar'

khilen muskuraen hansen aur hansaen