naya sal

phir nayā saal dabe paañv chalā aayā hai

aur miTte hue maddham se nuqūsh

daur-e-māzī kī ḳhalāoñ meñ nazar aate haiñ

jaise chhoḌī huī manzil kā nishāñ

jaise kuchh duur se aatī huī āvāz-e-jaras

kaun sahme hue māyūs diyoñ ko dekhe

phir bhī ye mujh ko ḳhayāl aatā hai

kitnī nau-ḳhez ummīdoñ ko sahāre na mile

kitnī Duubī huī kashtī ko kināre na mile

zulf lahrā.ī pe sāvan kī ghaTā ban na sakī

subah hañstī rahī bujhte rahe kitne chehre

chūḌiyāñ TuuT ga.iiñ maañg ke sindūr ujḌe

god vīrān huī

naġhme taḳhlīq hue hoñT sile

kitne fan-pāroñ ke ambār lage

shāh-rāhoñ pe jalāne ke liye

āshiyāne kā tasavvur hī abhī aayā thā

bijliyāñ kauñd ga.iiñ

hiroshima chīḳh uThā

kitnā pur-haul samāñ

kitnī bhayānak tārīḳh

ye mah-o-sāl ke phaile hue jaal

phir nayā saal dabe paañv chalā aayā hai

roz-o-shab jaise añdhere meñ luTeroñ ke giroh

apnī tārīk kamīñ gāhoñ meñ chhap kar baiTheñ

aur dāmānda saarā hī koī

ajnabī rāhoñ se Dartā huā ghabrāyā huā

apnī koī huī manzil kī taraf jaatā ho

aur luTere ise tanhā pā kar

us ke siine kā lahū le leñ ummīdoñ ke diye bujh jaa.eñ

kaun lekin dil insāñ kī tapish chhīn sake

phir nayā saal dabe paañv chalā aayā hai

kitnī bārīk hai ye sub.h kī pahlī kiran

kaun jaane ki na.ī daam bhī kyā lā.egī

kaan meñ aaj bhī mānūs sadā aatī hai

vahī dollar kā tilism

vahī tahzīb-o-tamaddun ke purāne da.ave

vahī pasmāñda mamālik kī taraqqī kā fareb

vahī tārīḳh siyāsat ke purāne shātir

atomī jañg kā elaan kiyā karte haiñ

kaun lekin dil-e-insāñ kī tapish chhīn sake

irtiqā āhan-o-faulād se kis tarah ruke

TuuT jā.eñge mah-o-sāl ke phaile hue jaal

phir nayā saal dabe paañv chalā aatā hai

jaao tārīk makānoñ meñ charāġhāñ kar do

aaj zanjīr kī ik aur kaḌī TuuT ga.ī

aaj duniyā ke avaam

apne siine se lagā.e hue apnī tārīḳh

apne hāthoñ meñ na.e ahd kā farmān liye

ik na.ī raah pe baḌhte hī chale jaate haiñ

roz-o-shab jaise añdhere meñ luTeroñ ke giroh

haath bāñdhe hue qadmoñ pe jabīneñ rakh deñ

phir nayā saal dabe paañv chalā aayā hai

jaao tārīk makānoñ meñ charāġhāñ kar do

phir naya sal dabe panw chala aaya hai

aur miTte hue maddham se nuqush

daur-e-mazi ki KHalaon mein nazar aate hain

jaise chhoDi hui manzil ka nishan

jaise kuchh dur se aati hui aawaz-e-jaras

kaun sahme hue mayus diyon ko dekhe

phir bhi ye mujh ko KHayal aata hai

kitni nau-KHez ummidon ko sahaare na mile

kitni Dubi hui kashti ko kinare na mile

zulf lahrai pe sawan ki ghaTa ban na saki

subah hansti rahi bujhte rahe kitne chehre

chuDiyan TuT gain mang ke sindur ujDe

god viran hui

naghme taKHliq hue honT sile

kitne fan-paron ke ambar lage

shah-rahon pe jalane ke liye

aashiyane ka tasawwur hi abhi aaya tha

bijliyan kaund gain

hiroshima chiKH uTha

kitna pur-haul saman

kitni bhayanak tariKH

ye mah-o-sal ke phaile hue jal

phir naya sal dabe panw chala aaya hai

roz-o-shab jaise andhere mein luTeron ke giroh

apni tarik kamin gahon mein chhap kar baiThen

aur damanda sara hi koi

ajnabi rahon se Darta hua ghabraya hua

apni koi hui manzil ki taraf jata ho

aur luTere ise tanha pa kar

us ke sine ka lahu le len ummidon ke diye bujh jaen

kaun lekin dil insan ki tapish chhin sake

phir naya sal dabe panw chala aaya hai

kitni barik hai ye subh ki pahli kiran

kaun jaane ki nai dam bhi kya laegi

kan mein aaj bhi manus sada aati hai

wahi dollar ka tilism

wahi tahzib-o-tamaddun ke purane dawe

wahi pasmanda mamalik ki taraqqi ka fareb

wahi tariKH siyasat ke purane shatir

atomi jang ka elan kiya karte hain

kaun lekin dil-e-insan ki tapish chhin sake

irtiqa aahan-o-faulad se kis tarah ruke

TuT jaenge mah-o-sal ke phaile hue jal

phir naya sal dabe panw chala aata hai

jao tarik makanon mein charaghan kar do

aaj zanjir ki ek aur kaDi TuT gai

aaj duniya ke awam

apne sine se lagae hue apni tariKH

apne hathon mein nae ahd ka farman liye

ek nai rah pe baDhte hi chale jate hain

roz-o-shab jaise andhere mein luTeron ke giroh

hath bandhe hue qadmon pe jabinen rakh den

phir naya sal dabe panw chala aaya hai

jao tarik makanon mein charaghan kar do