nazhad-e-nau

barahna-sar haiñ barhana tan haiñ barhana-pā haiñ

sharīr rūheñ

zamīr-e-hastī kī ārzūeñ

chaTaktī kaliyāñ

ki jin se būḌhī udaas galiyāñ

mahak rahī haiñ

ġharīb bachche ki jo shuā-e-sahar-gahī haiñ

hamārī qabroñ pe girte ashkoñ kā silsila haiñ

vo manzileñ jin kī jhalkiyoñ ko hamārī rāheñ

taras rahī haiñ

unhī ke qadmoñ meñ bas rahī haiñ

hasīn ḳhvāboñ

kī dhundlī duniyā.eñ jo sarāboñ

kā ruup dhāre

hamāre ehsās par sharāre

uñDeltī haiñ

unhīñ kī āñkhoñ meñ kheltī haiñ

unhī ke gum-sum

udaas chehroñ par jhilmilāte hue tabassum

meñ Dhal ga.e haiñ hamāre aañsū hamārī aaheñ

tavīl tārīkiyoñ meñ kho jā.eñge jab ik din

hamāre saa.e

is apnī duniyā kī laash uThā.e

to sail-e-ravāñ

kī koī mauj-e-hayāt-sāmāñ

faroġh-e-fardā

kā ruḳh pe Daale mahīn pardā

uchhal ke shāyad

sameT le zindagī kī sarhad

ke us kināre

pe ghūmte ālamoñ ke dhāre

ye sab jā hai ba-jā hai lekin

ye totlī nau-ḳhirām rūheñ ki jin kī har saañs añgbīñ

agar inhī koñpaloñ kī qismat meñ nāz-e-bālīdgī nahīñ hai

to bahtī nadiyoñ

meñ aane vaalī hazār sadiyoñ

kā ye talātum

sukūt-e-paiham kā ye tarannum

ye jhoñke jhoñke

meñ khulte ghūñghaT na.ī rutoñ ke

thakī ḳhalāoñ

meñ laakh an-dekhī kahkashāoñ

kī kāvish-e-ram

hazār nā-āfrīda aalam

tamām bātil

na un kā maqsad na un kā hāsil

agar inhī koñpaloñ kī qismat meñ nāz-e-bālīdgī nahīñ hai

barahna-sar hain barhana tan hain barhana-pa hain

sharir ruhen

zamir-e-hasti ki aarzuen

chaTakti kaliyan

ki jin se buDhi udas galiyan

mahak rahi hain

gharib bachche ki jo shua-e-sahar-gahi hain

hamari qabron pe girte ashkon ka silsila hain

wo manzilen jin ki jhalkiyon ko hamari rahen

taras rahi hain

unhi ke qadmon mein bas rahi hain

hasin KHwabon

ki dhundli duniyaen jo sarabon

ka rup dhaare

hamare ehsas par sharare

unDelti hain

unhin ki aankhon mein khelti hain

unhi ke gum-sum

udas chehron par jhilmilate hue tabassum

mein Dhal gae hain hamare aansu hamari aahen

tawil tarikiyon mein kho jaenge jab ek din

hamare sae

is apni duniya ki lash uThae

to sail-e-rawan

ki koi mauj-e-hayat-saman

farogh-e-farda

ka ruKH pe Dale mahin parda

uchhal ke shayad

sameT le zindagi ki sarhad

ke us kinare

pe ghumte aalamon ke dhaare

ye sab ja hai ba-ja hai lekin

ye totli nau-KHiram ruhen ki jin ki har sans angbin

agar inhi konpalon ki qismat mein naz-e-baalidgi nahin hai

to bahti nadiyon

mein aane wali hazar sadiyon

ka ye talatum

sukut-e-paiham ka ye tarannum

ye jhonke jhonke

mein khulte ghunghaT nai ruton ke

thaki KHalaon

mein lakh an-dekhi kahkashaon

ki kawish-e-ram

hazar na-afrida aalam

tamam baatil

na un ka maqsad na un ka hasil

agar inhi konpalon ki qismat mein naz-e-baalidgi nahin hai