nazm

vo ek lamha

jo sar paTaktā hai pattharoñ par

paḌā huā hai jo shaam ke phailte dhuveñ meñ lahū meñ lat-pat

vo ek lamha

ki jis kī ḳhātir hazāroñ sadiyāñ karoḌoñ barsoñ se ābla-pā

magar vo lamha

safar kī piilī udāsiyoñ ke kabūtaroñ ke paroñ se uljhā

savād-e-manzil kī mish.aloñ meñ

pighal pighal kar ayaañ huā hai

vo ek lamha

sulagte shabdoñ kī uñgliyoñ se girā jo nīche

to dhañs gayā phir aTal ma.ānī kī daldaloñ meñ

magar ye achchhā huā ki us dam

khajūr bhar kar jahāz aa.e

tamām nazreñ khajūr kī guThliyoñ meñ inzāl DhūñDtī thiiñ

vo chhe mahīne hamal uThā.e hamāre ghar kī qadīm zīnat

na sīḌhiyoñ par

na khiḌkiyoñ meñ

na chaa.e kī pyāliyoñ se uThte dhuveñ ke pīchhe

tamannā kāġhaz pe phail jaa.e to us kī shiddat kā naam TuuTe

safed bakrī kī aañkh se kaun jhāñktā hai

tumheñ ḳhabar hai

tumheñ ḳhabar ho to mujh se kah do

maiñ apne vālid kī qabr kā rāsta talāshūñ

idhar bhī sūraj meñ saarā manzar lahū lahū hai

udhar bhī sāyoñ meñ saarī āñhkeñ dhuāñ dhuāñ haiñ

ye band āñkhoñ meñ kaun chhup kar

badan ke andar ko jhāñktā hai

ḳhamoshiyoñ ke khañDar meñ gūñjī

ḳhamoshiyoñ ke khañDar meñ gūñjī azaañ fajar kī

vazū ke paanī ke saath saare gunāh Tapke

duā meñ us ne sharāb māñgī to

tishnagī ke sarāb chhalke

sitāre nīche utar ke aa.e

vo ek lamha

shikastagī ke badan ke andar

vo ek lamha

shikastagī ke badan se bāhar

vo ek lamha hazār sadiyoñ ke bandhanoñ se nikal kar aayā

vo ek lamha jo dastaras ke vasī.a halqoñ se duur rah kar

rutūbatoñ meñ baḌī tamāzat se muskurāyā

muqaddaroñ meñ hazār lamhoñ ke darmiyāñ jis kā taḳht ḳhālī

lahū meñ lat-pat vo ek lamha

vo ek lamha jo sar paTaktā hai pattharoñ par!

wo ek lamha

jo sar paTakta hai pattharon par

paDa hua hai jo sham ke phailte dhuwen mein lahu mein lat-pat

wo ek lamha

ki jis ki KHatir hazaron sadiyan karoDon barson se aabla-pa

magar wo lamha

safar ki pili udasiyon ke kabutaron ke paron se uljha

sawad-e-manzil ki mishalon mein

pighal pighal kar ayan hua hai

wo ek lamha

sulagte shabdon ki ungliyon se gira jo niche

to dhans gaya phir aTal maani ki daldalon mein

magar ye achchha hua ki us dam

khajur bhar kar jahaz aae

tamam nazren khajur ki guThliyon mein inzal DhunDti thin

wo chhe mahine hamal uThae hamare ghar ki qadim zinat

na siDhiyon par

na khiDkiyon mein

na chae ki pyaliyon se uThte dhuwen ke pichhe

tamanna kaghaz pe phail jae to us ki shiddat ka nam TuTe

safed bakri ki aankh se kaun jhankta hai

tumhein KHabar hai

tumhein KHabar ho to mujh se kah do

main apne walid ki qabr ka rasta talashun

idhar bhi suraj mein sara manzar lahu lahu hai

udhar bhi sayon mein sari aanhken dhuan dhuan hain

ye band aankhon mein kaun chhup kar

badan ke andar ko jhankta hai

KHamoshiyon ke khanDar mein gunji

KHamoshiyon ke khanDar mein gunji azan fajar ki

wazu ke pani ke sath sare gunah Tapke

dua mein us ne sharab mangi to

tishnagi ke sarab chhalke

sitare niche utar ke aae

wo ek lamha

shikastagi ke badan ke andar

wo ek lamha

shikastagi ke badan se bahar

wo ek lamha hazar sadiyon ke bandhanon se nikal kar aaya

wo ek lamha jo dastaras ke wasia halqon se dur rah kar

rutubaton mein baDi tamazat se muskuraya

muqaddaron mein hazar lamhon ke darmiyan jis ka taKHt KHali

lahu mein lat-pat wo ek lamha

wo ek lamha jo sar paTakta hai pattharon par!