nazm

nahīñ maiñ kisī yūnānī almiye kā

markazī kirdār nahīñ

na hī maiñ is liye banā thā

maiñ to ek ḳhāmosh tamāshā.ī huuñ

hazāroñ saal pattharoñ meñ jakḌe

kisī markazī kirdār kī āñkheñ

jab shāhīn se nochvā.ī jaatī haiñ

aur jab vo dard se karāh kar kahtā hai

maiñ tamām pyaar karne vāloñ ke liye ek karbnāk manzar huuñ

yā sālhā-sāl samundaroñ meñ bhaTakne vaale sayyāhoñ se

ḳhudā jab un ke ghar aane kā din chhīn letā hai

yā jab koī sarkash markazī yūnānī kirdār

apne ābā.ī ḳhudā se muskurā kar kahtā hai

taḳhlīq ke baad mujh par tumhārā koī haq nahīñ rahā

to maiñ apne baġhal vaale māsūm tamāshā.ī se

māchis maañg kar apnā cigarette sulgā letā huuñ

ḳhudā yā ye log kitne bevaqūf haiñ

mujhe zindagī kā koī tajraba nahīñ

shāyad apnī ġhaltiyoñ ko hañs kar bhūlne ke fuqdān ko tajraba kahte haiñ

yā phir shāyad isī iḳhtilāj-e-kam-tarī ko

zehn ke frame meñ band rakhne ko

shāyad mujhe mālūm nahīñ

ye sadī dard-e-zachgī se karāh rahī hai

aur maiñ tavārīḳh ke shātirāna sehn meñ

baiThā soch rahā huuñ

maiñ nahīñ ye duniyā za.iif ho ga.ī hai

aur jald hī mar jā.egī

magar muarriḳh mere baare meñ kyā likheñge

nahin main kisi yunani almiye ka

markazi kirdar nahin

na hi main is liye bana tha

main to ek KHamosh tamashai hun

hazaron sal pattharon mein jakDe

kisi markazi kirdar ki aankhen

jab shahin se nochwai jati hain

aur jab wo dard se karah kar kahta hai

main tamam pyar karne walon ke liye ek karbnak manzar hun

ya salha-sal samundaron mein bhaTakne wale sayyahon se

KHuda jab un ke ghar aane ka din chhin leta hai

ya jab koi sarkash markazi yunani kirdar

apne aabai KHuda se muskura kar kahta hai

taKHliq ke baad mujh par tumhaara koi haq nahin raha

to main apne baghal wale masum tamashai se

machis mang kar apna cigarette sulga leta hun

KHuda ya ye log kitne bewaquf hain

mujhe zindagi ka koi tajraba nahin

shayad apni ghaltiyon ko hans kar bhulne ke fuqdan ko tajraba kahte hain

ya phir shayad isi iKHtilaj-e-kam-tari ko

zehn ke frame mein band rakhne ko

shayad mujhe malum nahin

ye sadi dard-e-zachgi se karah rahi hai

aur main tawariKH ke shatirana sehn mein

baiTha soch raha hun

main nahin ye duniya zaif ho gai hai

aur jald hi mar jaegi

magar muarriKH mere bare mein kya likhenge