nazm

aur phir ik din maiñ aur tum in ūñchī nīchī dīvāroñ ke jhurmuT meñ utre

jin meñ kabhī hamārī rūhoñ ko zinda chun diyā gayā thā

is vaqt āñgan āñgan meñ tirchhī kirnoñ ne dhuup ke kañgare sāyoñ kī qāshoñ meñ Taañk diye the

dekhā huā sā koī samāñ purānā us din ham ne dekhā

yuuñ lagtā thā jaise āsmānoñ kī raushaniyāñ jhuk jhuk kar us ik qarye ko dekh rahī thiiñ

aur hameñ tab vo din yaad aa.e jab maut hamārī zindagiyoñ se guzar rahī thī aisī hī sub.hoñ kī oT meñ

ham un zīna-ba-zīna muñDeroñ ke jhurmuT meñ the

aur us shahr ke log ab bhī galiyoñ meñ ḳhvāñche lagā.e apnī zindagiyoñ ko saj rahe the

aur phir ham ne sochā

kaun achchhā hai ham jo murda chehroñ se jiine kī ḳhvāhish paate haiñ yā vo jo

ham ko zinda dekh ke hamārī maut ko maan lete haiñ

abhī abhī to mere saath saath the ham use guzre hue zamānoñ ke ḳhayālo phir kab lauToge

ik din phir bhī tumhāre saath is ḳhaak ke taḳhte tak jā.ūñgā

jis se Dhake hue be-nūr gaḌhoñ meñ

kuchh nādīda āñkheñ ham ko dekh ke ab bhī hañs hañs uThtī nazar aatī haiñ

aur phir ek din main aur tum in unchi nichi diwaron ke jhurmuT mein utre

jin mein kabhi hamari ruhon ko zinda chun diya gaya tha

is waqt aangan aangan mein tirchhi kirnon ne dhup ke kangare sayon ki qashon mein Tank diye the

dekha hua sa koi saman purana us din hum ne dekha

yun lagta tha jaise aasmanon ki raushaniyan jhuk jhuk kar us ek qarye ko dekh rahi thin

aur hamein tab wo din yaad aae jab maut hamari zindagiyon se guzar rahi thi aisi hi subhon ki oT mein

hum un zina-ba-zina munDeron ke jhurmuT mein the

aur us shahr ke log ab bhi galiyon mein KHwanche lagae apni zindagiyon ko saj rahe the

aur phir hum ne socha

kaun achchha hai hum jo murda chehron se jine ki KHwahish pate hain ya wo jo

hum ko zinda dekh ke hamari maut ko man lete hain

abhi abhi to mere sath sath the hum use guzre hue zamanon ke KHayalo phir kab lauToge

ek din phir bhi tumhaare sath is KHak ke taKHte tak jaunga

jis se Dhake hue be-nur gaDhon mein

kuchh nadida aankhen hum ko dekh ke ab bhi hans hans uThti nazar aati hain