nazm

tah-ba-tah dil kī kudūrat

merī āñkhoñ meñ umañD aa.ī to kuchh chāra na thā

chāra-gar kī maan lī

aur maiñ ne gard-ālūd āñkhoñ ko lahū se dho liyā

maiñ ne gard-ālūd āñkhoñ ko lahū se dho liyā

aur ab har shakl-o-sūrat

ālam-e-maujūd kī har ek shai

merī āñkhoñ ke lahū se is tarah ham-rañg hai

ḳhurshīd kā kundan lahū

mahtāb kī chāñdī lahū

sub.hoñ kā hañsnā bhī lahū

rātoñ kā ronā bhī lahū

har shajar mīnār-e-ḳhūñ har phuul ḳhūn-dīda hai

har nazar ik tār-e-ḳhūñ har aks ḳhūñ-bālīda hai

mauj-e-ḳhūñ jab tak ravāñ rahtī hai us kā surḳh rañg

jazba-e-shauq-e-shahādat dard, ġhaiz o ġham kā rañg

aur tham jaa.e to kajlā kar

faqat nafrat kā shab maut kā

har ik rañg ke mātam kā rañg

chāra-gar aisā na hone de

kahīñ se lā koī sailāb-e-ashk

āb-e-vazū

jis meñ dhul jaa.eñ to shāyad dhul sake

merī āñkhoñ merī gard-ālūd āñkhoñ kā lahū

tah-ba-tah dil ki kudurat

meri aankhon mein umanD aai to kuchh chaara na tha

chaara-gar ki man li

aur main ne gard-alud aankhon ko lahu se dho liya

main ne gard-alud aankhon ko lahu se dho liya

aur ab har shakl-o-surat

aalam-e-maujud ki har ek shai

meri aankhon ke lahu se is tarah ham-rang hai

KHurshid ka kundan lahu

mahtab ki chandi lahu

subhon ka hansna bhi lahu

raaton ka rona bhi lahu

har shajar minar-e-KHun har phul KHun-dida hai

har nazar ek tar-e-KHun har aks KHun-baalida hai

mauj-e-KHun jab tak rawan rahti hai us ka surKH rang

jazba-e-shauq-e-shahadat dard, ghaiz o gham ka rang

aur tham jae to kajla kar

faqat nafrat ka shab maut ka

har ek rang ke matam ka rang

chaara-gar aisa na hone de

kahin se la koi sailab-e-ashk

aab-e-wazu

jis mein dhul jaen to shayad dhul sake

meri aankhon meri gard-alud aankhon ka lahu