nazm ki khiDki suni hai

nazm koī doshīza hogī

hamsā.e ke ghar aa kar mehmān banī hai

raat ke khāne kī dāvat kā soch rahā huuñ

shāyad ye āvāz nahīñ hai

sargoshī ke letter box meñ

der se aane vaalā ḳhat hai

nazm koī gandum kā ḳhosha

jis ke rangoñ kā andāza

phal pakne par hotā hai

ujlat kā ḳhamyāza hogī

ham ne vaqt se pahle chal paḌne ko

apnā ḳhāsa maan ke ġhalatī kī

vo aurat hogī

jis meñ jism kī asr ke lamhe kī kaifiyat

ḳhvāhish par bhārī hotī haiñ

nazm pahāḌī nadī hogī

jis ke jazboñ kī labrezī

aur tezī kī ḳhushbū ko bhī

duur se dekhā jā saktā hai

aisī hogī

vaisī hogī

kah sakte haiñ

mafrūzoñ ke phuul kahīñ bhī khil sakte haiñ

lekin manzar-nāme kī nākāmī par

kyā kahte ho

Dhaltī shaam ke ḳhālī baazū

dekh ke aisā kyoñ lagtā hai

nazm kī khiḌkī suunī hai

nazm koi doshiza hogi

hamsae ke ghar aa kar mehman bani hai

raat ke khane ki dawat ka soch raha hun

shayad ye aawaz nahin hai

sargoshi ke letter box mein

der se aane wala KHat hai

nazm koi gandum ka KHosha

jis ke rangon ka andaza

phal pakne par hota hai

ujlat ka KHamyaza hogi

hum ne waqt se pahle chal paDne ko

apna KHasa man ke ghalati ki

wo aurat hogi

jis mein jism ki asr ke lamhe ki kaifiyat

KHwahish par bhaari hoti hain

nazm pahaDi nadi hogi

jis ke jazbon ki labrezi

aur tezi ki KHushbu ko bhi

dur se dekha ja sakta hai

aisi hogi

waisi hogi

kah sakte hain

mafruzon ke phul kahin bhi khil sakte hain

lekin manzar-name ki nakaami par

kya kahte ho

Dhalti sham ke KHali bazu

dekh ke aisa kyon lagta hai

nazm ki khiDki suni hai