nazm

use chāheñ to aa.heñ

dil kī sab rāheñ dhueñ se tīra-o-tārīk kar Dāleñ

nigāheñ yuuñ karāheñ

jaise tā-hadd-e-nazar us kī shuā.eñ marg-āsā jaal phailā deñ

har ik shab saañs ke tāroñ ko uljhā.e

sahar-dam ḳhvāb-gah par kasmapursī saaya saaya is tarah mañDlā.e

pairāhan-e-lahū meñ tar-ba-tar jaise kisī turbat pe lahrā.e

use DhūñDeñ to raste

jaan ke darpai

jahāzoñ kashtiyoñ se lahlahāte zindagī-parvar samundar

barf se bhar jaa.eñ

har jānib mileñ koh-e-nidā ġhol-e-bayābāñ

aur kabhī ḳhemoñ kī ḳhūnī dhajjiyāñ TuuTī tanābeñ haDDiyāñ

haibat dilā.eñ

kārvāñ katrā.eñ

jaise ham zamīñ par bojh hoñ

har samt sidra hai

sitāre ḳhushbueñ jugnū havā.eñ sab ġhalat raste batā.eñ

paañv nezoñ par chaleñ

aur vo to kyā

dast-e-talab meñ apnī ḳhākistar bhī anqā ho

ise paa.eñ to saare mahl

gir jaa.eñ iram uTh jaa.eñ

peḌoñ aur dīvāroñ ke saa.e uḌ chaleñ

sūraj kī kirneñ muḌ chaleñ kuchh aur duniyāoñ kī jānib

uñgliyāñ uTTheñ sannāToñ kī tarah

aur saath chalnā ḳhalq kī ismat-darī jaise

zamīñ af af se fankāroñ se neshoñ se bharī jaise

use chāheñ to kyā

DhūñDheñ to kaise

paa.eñ to pā kar kahāñ jaa.eñ

use chahen to aahen

dil ki sab rahen dhuen se tira-o-tarik kar Dalen

nigahen yun karahen

jaise ta-hadd-e-nazar us ki shuaen marg-asa jal phaila den

har ek shab sans ke taron ko uljhae

sahar-dam KHwab-gah par kasmapursi saya saya is tarah manDlae

pairahan-e-lahu mein tar-ba-tar jaise kisi turbat pe lahrae

use DhunDen to raste

jaan ke darpai

jahazon kashtiyon se lahlahate zindagi-parwar samundar

barf se bhar jaen

har jaanib milen koh-e-nida ghol-e-bayaban

aur kabhi KHemon ki KHuni dhajjiyan TuTi tanaben haDDiyan

haibat dilaen

karwan katraen

jaise hum zamin par bojh hon

har samt sidra hai

sitare KHushbuen jugnu hawaen sab ghalat raste bataen

panw nezon par chalen

aur wo to kya

dast-e-talab mein apni KHakistar bhi anqa ho

ise paen to sare mahl

gir jaen iram uTh jaen

peDon aur diwaron ke sae uD chalen

suraj ki kirnen muD chalen kuchh aur duniyaon ki jaanib

ungliyan uTThen sannaTon ki tarah

aur sath chalna KHalq ki ismat-dari jaise

zamin af af se fankaron se neshon se bhari jaise

use chahen to kya

DhunDhen to kaise

paen to pa kar kahan jaen