nazm mujhe likhti hai

maiñ nazm ko nahīñ likhtī

nazm mujhe likhtī hai

nazm mere hoñToñ se hañstī

merī āñkhoñ se rotī hai

maiñ masrūf hotī huuñ to

nazm mere bistar par ārām kartī hai

nazm kī ḳhvāboñ bharī niilī āñkheñ

merā ta.āqub kartī haiñ to

merā ḳhālī-pan lafzoñ se bhar jaatā hai

aur jab surma.ī shaam

raat kī añdherī kokh meñ

ziina ziina utartī hai to

nazm yādoñ kī poTlī khol kar baiTh jaatī hai

yādeñ saf.ha-e-qirtās par phail jaatī haiñ

aur phir parat-dar-parat

nazm mujhe likhtī hai

maan lo

maiñ nazm ko nahīñ likhtī

main nazm ko nahin likhti

nazm mujhe likhti hai

nazm mere honTon se hansti

meri aankhon se roti hai

main masruf hoti hun to

nazm mere bistar par aaram karti hai

nazm ki KHwabon bhari nili aankhen

mera taaqub karti hain to

mera KHali-pan lafzon se bhar jata hai

aur jab surmai sham

raat ki andheri kokh mein

zina zina utarti hai to

nazm yaadon ki poTli khol kar baiTh jati hai

yaaden safha-e-qirtas par phail jati hain

aur phir parat-dar-parat

nazm mujhe likhti hai

man lo

main nazm ko nahin likhti