nazm

roz raat ke pahle pahar

kore kāġhaz par tumhārā naam likhtā huuñ

aur mausam-e-bahār kā āġhāz ho jaatā hai

kāġhaz par tumhāre naam se ik bel phūTtī hai

us kī koñpleñ nikaltī haiñ

ḳhush-rañg shagūfe khilte haiñ

bel mohabbat kī dhun par nāchnā shurūa kar detī hai

nāchte nāchte puure varaq ko gulistāñ kar detī hai

maiñ thoḌī sī ḳhush-bū apne hāthoñ par mal letā huuñ

kuchh rañg apne chehre par lagā letā huuñ

muskān hoñToñ par sajā letā huuñ

baaqī raat puure ek sau phūloñ kā itr kashīd kartā huuñ

itr apnī bayāz par uñDel detā huuñ

nazm ban jaatī hai

roz raat ke pahle pahar

kore kaghaz par tumhaara nam likhta hun

aur mausam-e-bahaar ka aaghaz ho jata hai

kaghaz par tumhaare nam se ek bel phuTti hai

us ki konplen nikalti hain

KHush-rang shagufe khilte hain

bel mohabbat ki dhun par nachna shurua kar deti hai

nachte nachte pure waraq ko gulistan kar deti hai

main thoDi si KHush-bu apne hathon par mal leta hun

kuchh rang apne chehre par laga leta hun

muskan honTon par saja leta hun

baqi raat pure ek sau phulon ka itr kashid karta hun

itr apni bayaz par unDel deta hun

nazm ban jati hai