nazm

ghar se office jaate hue

maiñ roz saḌak ke daa.eñ baa.eñ

daraḳhtoñ ko gintā huā chaltā huuñ

hamesha gine hue daraḳhtoñ kī tādād muḳhtalif hotī hai

kabhī do sau biis

kabhī tiin sau gyārah

kabhī kabhī to daraḳhtoñ kī tādād itnī baḌh jaatī hai

ki mujhe guzishta din ke ādād o shumār par

shak hone lagtā hai

par ek din patā chalā

rāste ke daraḳht aadhe bhī nahīñ rahe

kyā aadhe daraḳht kaaT diye ga.e haiñ

lekin agle roz daraḳhtoñ kī tādād itnī thī

ki merā ḳhud par se e'timād uTh gayā

mujhe yuuñ lagā

jaise kuchh daraḳht mujhe dekh kar

idhar udhar ho jaate haiñ

kuchh dūsre daraḳhtoñ ke pīchhe chhup jaate haiñ

kuchh daraḳht rātoñ raat is liye ug aate haiñ

ki mujhe hairān kar deñ

aur kuchh is liye ġhā.eb ho jaate haiñ

ki merā ḳhud par se e'timād hī jaatā rahe

lekin ye baat bhī ek din ġhalat sābit ho ga.ī

mere ghar se daftar tak ke rāste meñ

koī daraḳht thā hī nahīñ

ye mujhe ka.ī logoñ ne batāyā

dūsre ka.ī logoñ ne is baat kī tasdīq kī

kuchh ne ye mānñe tak se inkār kar diyā

ki is rāste par kabhī koī daraḳht bhī thā

us roz jab maiñ udaas aur ġhamgīñ

office se ghar lauT rahā thā

mere rāste ke donoñ jānib

daraḳht saḌak par nīche tak jhuk aa.e the

har ghar kī chaar dīvārī ke uupar se

ek na ek daraḳht jhāñk rahā thā

gharoñ kī balconiyoñ

aur chhatoñ par ug aa.e the daraḳht

kuchh daraḳht to ulTe hī khaḌe the

kuchh aadhe dīvāroñ meñ

aur aadhe dīvāroñ ke shagāfoñ se

bāhar nikal kar

saḌak ko yuuñ tak rahe the

jaise rāhgīroñ ko gin rahe hoñ

ghar se office jate hue

main roz saDak ke daen baen

daraKHton ko ginta hua chalta hun

hamesha gine hue daraKHton ki tadad muKHtalif hoti hai

kabhi do sau bis

kabhi tin sau gyarah

kabhi kabhi to daraKHton ki tadad itni baDh jati hai

ki mujhe guzishta din ke aadad o shumar par

shak hone lagta hai

par ek din pata chala

raste ke daraKHt aadhe bhi nahin rahe

kya aadhe daraKHt kaT diye gae hain

lekin agle roz daraKHton ki tadad itni thi

ki mera KHud par se e'timad uTh gaya

mujhe yun laga

jaise kuchh daraKHt mujhe dekh kar

idhar udhar ho jate hain

kuchh dusre daraKHton ke pichhe chhup jate hain

kuchh daraKHt raaton raat is liye ug aate hain

ki mujhe hairan kar den

aur kuchh is liye ghaeb ho jate hain

ki mera KHud par se e'timad hi jata rahe

lekin ye baat bhi ek din ghalat sabit ho gai

mere ghar se daftar tak ke raste mein

koi daraKHt tha hi nahin

ye mujhe kai logon ne bataya

dusre kai logon ne is baat ki tasdiq ki

kuchh ne ye manne tak se inkar kar diya

ki is raste par kabhi koi daraKHt bhi tha

us roz jab main udas aur ghamgin

office se ghar lauT raha tha

mere raste ke donon jaanib

daraKHt saDak par niche tak jhuk aae the

har ghar ki chaar diwari ke upar se

ek na ek daraKHt jhank raha tha

gharon ki balconiyon

aur chhaton par ug aae the daraKHt

kuchh daraKHt to ulTe hi khaDe the

kuchh aadhe diwaron mein

aur aadhe diwaron ke shagafon se

bahar nikal kar

saDak ko yun tak rahe the

jaise rahgiron ko gin rahe hon