nazm

us kī galī meñ phir mujhe ik baar le chalo

majbūr kar ke mujh ko mire yaar le chalo

shāyad ye merā vahm ho merā ḳhayāl ho

mumkin hai mere baad use merā malāl ho

pachhtā rahā ho ab mujhe dar se uThā ke vo

baiThā ho merī raah meñ āñkheñ bichhā ke vo

us ne bhī to kiyā thā mujhe pyaar le chalo

ab us galī meñ koī na aa.egā mere baad

us dar pe kaun ḳhuun bahā.egā mere baad

maiñ ne to sang-o-ḳhisht se Takrā ke apnā sar

gulnār kar diye the lahū se vo bām-o-dar

phir muntazir haiñ vo dar-o-dīvār le chalo

vo jis ne mere siine ko zaḳhmoñ se bhar diyā

chhuḌvā ke apnā dar mujhe dar dar kā kar diyā

maanā ki us ke zulm-o-sitam se huuñ nīm-jāñ

phir bhī maiñ saḳht jaañ huuñ pahuñch jā.ūñgā vahāñ

sau baar jā.ūñgā mujhe sau baar le chalo

dīvāna kah ke logoñ ne har baat Taal dī

duniyā ne mere paañv meñ zanjīr Daal dī

chāho jo tum to merā muqaddar sañvār do

yaaro ye mere paañv kī beḌī utaar do

yā khīñchte hue sar-e-bāzār le chalo

us kī galī ko jāntā pahchāntā huuñ maiñ

vo merī qatl-gāh hai ye māntā huuñ maiñ

us kī galī meñ maut muqaddar kī baat hai

'shāhid' ye maut ahl-e-vafā kī hayāt hai

maiñ ḳhud bhī maut kā huuñ talabgār le chalo

us kī galī meñ phir mujhe ik baar le chalo

us ki gali mein phir mujhe ek bar le chalo

majbur kar ke mujh ko mere yar le chalo

shayad ye mera wahm ho mera KHayal ho

mumkin hai mere baad use mera malal ho

pachhta raha ho ab mujhe dar se uTha ke wo

baiTha ho meri rah mein aankhen bichha ke wo

us ne bhi to kiya tha mujhe pyar le chalo

ab us gali mein koi na aaega mere baad

us dar pe kaun KHun bahaega mere baad

main ne to sang-o-KHisht se Takra ke apna sar

gulnar kar diye the lahu se wo baam-o-dar

phir muntazir hain wo dar-o-diwar le chalo

wo jis ne mere sine ko zaKHmon se bhar diya

chhuDwa ke apna dar mujhe dar dar ka kar diya

mana ki us ke zulm-o-sitam se hun nim-jaan

phir bhi main saKHt jaan hun pahunch jaunga wahan

sau bar jaunga mujhe sau bar le chalo

diwana kah ke logon ne har baat Tal di

duniya ne mere panw mein zanjir Dal di

chaho jo tum to mera muqaddar sanwar do

yaro ye mere panw ki beDi utar do

ya khinchte hue sar-e-bazar le chalo

us ki gali ko jaanta pahchanta hun main

wo meri qatl-gah hai ye manta hun main

us ki gali mein maut muqaddar ki baat hai

'shahid' ye maut ahl-e-wafa ki hayat hai

main KHud bhi maut ka hun talabgar le chalo

us ki gali mein phir mujhe ek bar le chalo