nazr-e-firaq

ai dil-e-kāfir ijz se munkir aaj tirā sar ḳham kyuuñ hai

terī haTelī shiryānoñ meñ ye bebas mātam kyuuñ hai

aañkh to ronā bhuul ga.ī thī phir har manzar nam kyuuñ hai

mat roko bahne do aañsū kisī ko karte haiñ parnām

aap jhukā hai jhukne do sar chhupā thā us meñ koī salām

shāyad us ke huzūr meñ ho tum jis ko kahte haiñ anjām

vo hastī kī sarhad-e-āḳhir huā jahāñ har safar tamām

bebas hai insāñ bebas hai taktī rah ga.ī rotī shaam

uTh gayā koī bharī duniyā se baaqī rahe ḳhudā kā naam

yā phir kāġhaz par parchhā.īñ milegā jis ko sabt-e-davām

ye TukḌe insānī dil ke shā.er aur shā.er kā kalām

naaz karūñgī ḳhush-baḳhtī meñ maiñ ne 'firāq' ko dekhā thā

ujḌe ghar meñ vo tahzīboñ ke sañgam par baiThā thā

garm ham-āġhoshī sadiyoñ kī hogī kitnī pyaar bharī

jis kī bāñhoñ meñ khelī thī us kī soch kī sundartā

sher kā dil shaffāf thā itnā jaise ā.īna-e-tārīḳh

kyā bhar puur visāl thā jis ne us shā.er ko janm diyā

gar tārīḳh ne pāgal ho kar ḳhud apnā sar phoḌā hai

ḳhuun uchhālā hai galiyoñ meñ apnā hanDolā toḌā hai

chhīñT na thī dāman par us ke kaun ghaaT dho baiThā thā

jise samajhte ho nā-mumkin vo us insāñ jaisā thā

insāñ bhī itnā māmūlī jaise apnā ham-sāya

apne sher sunānā us kā aur ḳhud hairāñ ho jaanā

bātoñ meñ māsūm mahak thī āñkhoñ meñ bechain lapak

ḳhāmoshī ke vaqfe yuuñ jaise us ne kuchh dekhā thā

piiḌ bahut jhelī thī us ne itnī baat to zāhir thī

lahja meñ shoḳhī thī jaise raakh meñ chamke añgāra

sañgam ke paanī par maiñ ne dekhī thī kaisī tasvīr

uḌā lahak kar ik jal-panchhī khīñch gayā paanī pe lakīr

jamunā kī niilī gahrā.ī bhed bharī chup se bojhal

gañgā ke dhāre kī jumbish ujlī tāqat aur be-kal

is paanī meñ aks Dāltā āsmān kā ik TukḌā

miTTī ke but hare nāriyal chandan lagā koī mukhḌā

vo dhāroñ par naav khetā sūkhā panjar māñjhī kā

daan ke paise gintā panDit tāñba sūraj sāñjhī kā

jamunā par mīnār qila ke gumbad kā tirchhā saayā

pāksitān se aa.e muhājir geñde kī TuuTī maalā

paanī meñ chappū kī shap shap bātoñ ke TuuTe TukḌe

yahīñ kahīñ par ham se ojhal sarasvatī bhī bahtī hai

jo samjhī jo aage samjhūñ chhalak rahā hai dil kā jaam

vo manzar jo ḳhud se baḌā thā us kā gherā tumhāre naam

ye kamre kā maañd ujālā bāhar huuk papihe kī

khiḌkī par būñdoñ kī dastak sāñseñ bhartī ḳhāmoshī

puurī baat nahīñ batlātā gūñge aañsū ro denā

terī dhartī sah na sakegī itne husn ko kho denā

tanhā aur apāhij būḌhe tujhe na marne deñge log

abhī to jīvan bāñjh nahīñ hai phir tujh ko janmeñge log

ai dil-e-kafir ijz se munkir aaj tera sar KHam kyun hai

teri haTeli shiryanon mein ye bebas matam kyun hai

aankh to rona bhul gai thi phir har manzar nam kyun hai

mat roko bahne do aansu kisi ko karte hain parnam

aap jhuka hai jhukne do sar chhupa tha us mein koi salam

shayad us ke huzur mein ho tum jis ko kahte hain anjam

wo hasti ki sarhad-e-aKHir hua jahan har safar tamam

bebas hai insan bebas hai takti rah gai roti sham

uTh gaya koi bhari duniya se baqi rahe KHuda ka nam

ya phir kaghaz par parchhain milega jis ko sabt-e-dawam

ye TukDe insani dil ke shaer aur shaer ka kalam

naz karungi KHush-baKHti mein main ne 'firaq' ko dekha tha

ujDe ghar mein wo tahzibon ke sangam par baiTha tha

garm ham-aghoshi sadiyon ki hogi kitni pyar bhari

jis ki banhon mein kheli thi us ki soch ki sundarta

sher ka dil shaffaf tha itna jaise aaina-e-tariKH

kya bhar pur visal tha jis ne us shaer ko janm diya

gar tariKH ne pagal ho kar KHud apna sar phoDa hai

KHun uchhaala hai galiyon mein apna hanDola toDa hai

chhinT na thi daman par us ke kaun ghaT dho baiTha tha

jise samajhte ho na-mumkin wo us insan jaisa tha

insan bhi itna mamuli jaise apna ham-saya

apne sher sunana us ka aur KHud hairan ho jaana

baaton mein masum mahak thi aankhon mein bechain lapak

KHamoshi ke waqfe yun jaise us ne kuchh dekha tha

piD bahut jheli thi us ne itni baat to zahir thi

lahja mein shoKHi thi jaise rakh mein chamke angara

sangam ke pani par main ne dekhi thi kaisi taswir

uDa lahak kar ek jal-panchhi khinch gaya pani pe lakir

jamuna ki nili gahrai bhed bhari chup se bojhal

ganga ke dhaare ki jumbish ujli taqat aur be-kal

is pani mein aks Dalta aasman ka ek TukDa

miTTi ke but hare nariyal chandan laga koi mukhDa

wo dhaaron par naw kheta sukha panjar manjhi ka

dan ke paise ginta panDit tanba suraj sanjhi ka

jamuna par minar qila ke gumbad ka tirchha saya

paksitan se aae muhajir gende ki TuTi mala

pani mein chappu ki shap shap baaton ke TuTe TukDe

yahin kahin par hum se ojhal saraswati bhi bahti hai

jo samjhi jo aage samjhun chhalak raha hai dil ka jam

wo manzar jo KHud se baDa tha us ka ghera tumhaare nam

ye kamre ka mand ujala bahar huk papihe ki

khiDki par bundon ki dastak sansen bharti KHamoshi

puri baat nahin batlata gunge aansu ro dena

teri dharti sah na sakegi itne husn ko kho dena

tanha aur apahij buDhe tujhe na marne denge log

abhi to jiwan banjh nahin hai phir tujh ko janmenge log