nazr-e-watan

nazr-e-vatan phir ai dil dīvāna chāhiye

phir har qadam pe sajda-e-shukrāna chāhiye

phir sar-zamīñ vatan kī hai nazroñ ke sāmne

phir lab pe ek nāra-e-mastāna chāhiye

bachpan kī yaad letī hai phir dil meñ chuTkiyāñ

phir be-ḳhudī ba-hujjat-e-tiflāna chāhiye

barsoñ ke ba.ad aa.e haiñ bāġh-e-vatan meñ ham

phir har kalī ko sajda-e-mastāna chāhiye

kohsār sabz-posh nazar aa.e duur se

phir lab pe chaar bait kā afsāna chāhiye

jis kūche meñ huiiñ kabhī rusvā.iyāñ nasīb

us kā tavāf bā-dil-e-dīvāna chāhiye

baḳhshā thā jis ne pahle-pahal dil ko dard-e-ishq

phir us ke dar pe sajda-e-shukrāna chāhiye

phir dil ko ho yaqīñ na kisī ke visāl kā

phir vāqi.a ba-sūrat-e-afsāna chāhiye

phir shauq se mileñge kisī gul-ezār se

phir lab pe shor-e-bulbul-e-mastāna chāhiye

jhūlā jhūlā.eñge kisī mast-e-shabāb ko

raqsāñ fazā meñ phir mai-o-mai-ḳhāna chāhiye

paa.e talab ko vādī-e-parvīñ hai nīm-gām

phir aarzū ko manzil-e-jānāna chāhiye

phir ḳhirman sukūñ ko haiñ darkār bijliyāñ

phir be-hijāb jalva-e-jānāna chāhiye

phir zauq-e-mai-kashī ko hai me.arāj kī talab

kausar kā baada chāñd kā paimāna chāhiye

phir shauq ban ke dil meñ dhaḌaktī hai zindagī

phir jumbish-e-tabassum-e-jānāna chāhiye

phir sīna-e-umīd meñ raqsāñ hai barq-e-tūr

phir pursish mazāq kalīmāna chāhiye

bālā-e-koh sāya-e-abr-e-bahār meñ

parvīn-o-māhtāb kā kāshāna chāhiye

phir us harīm-e-nūr ke āġhosh-e-nāz meñ

ik gul-kada ba-rañg-e-parī-ḳhāna chāhiye

phir abr-o-bāġh-o-nik.hat-o-gul ke hujūm meñ

sham.a o sarv o bāda-o-paimāna chāhiye

phir us kī chashm-e-mast pe gesū hoñ pur-fishāñ

phir abr-e-shām-gūñ sar-e-mai-ḳhāna chāhiye

phir chāñdnī meñ dāman-e-dariyā ye ai nadīm

raqs-e-sharāb-o-gardish-e-paimāna chāhiye

josh-e-tarab ne hashr sā dil meñ kiyā bapā

phir be-ḳhudī ko girya-e-mastāna chāhiye

'aḳhtar' vatan meñ aa ke khulā hai ye husn-e-rāz

is muḳhtasar sī umr meñ kyā kyā na chāhiye

nazr-e-watan phir ai dil diwana chahiye

phir har qadam pe sajda-e-shukrana chahiye

phir sar-zamin watan ki hai nazron ke samne

phir lab pe ek nara-e-mastana chahiye

bachpan ki yaad leti hai phir dil mein chuTkiyan

phir be-KHudi ba-hujjat-e-tiflana chahiye

barson ke baad aae hain bagh-e-watan mein hum

phir har kali ko sajda-e-mastana chahiye

kohsar sabz-posh nazar aae dur se

phir lab pe chaar bait ka afsana chahiye

jis kuche mein huin kabhi ruswaiyan nasib

us ka tawaf ba-dil-e-diwana chahiye

baKHsha tha jis ne pahle-pahal dil ko dard-e-ishq

phir us ke dar pe sajda-e-shukrana chahiye

phir dil ko ho yaqin na kisi ke visal ka

phir waqia ba-surat-e-afsana chahiye

phir shauq se milenge kisi gul-ezar se

phir lab pe shor-e-bulbul-e-mastana chahiye

jhula jhulaenge kisi mast-e-shabab ko

raqsan faza mein phir mai-o-mai-KHana chahiye

pae talab ko wadi-e-parwin hai nim-gam

phir aarzu ko manzil-e-jaanana chahiye

phir KHirman sukun ko hain darkar bijliyan

phir be-hijab jalwa-e-jaanana chahiye

phir zauq-e-mai-kashi ko hai mearaj ki talab

kausar ka baada chand ka paimana chahiye

phir shauq ban ke dil mein dhaDakti hai zindagi

phir jumbish-e-tabassum-e-jaanana chahiye

phir sina-e-umid mein raqsan hai barq-e-tur

phir pursish mazaq kalimana chahiye

baala-e-koh saya-e-abr-e-bahaar mein

parwin-o-mahtab ka kashana chahiye

phir us harim-e-nur ke aaghosh-e-naz mein

ek gul-kada ba-rang-e-pari-KHana chahiye

phir abr-o-bagh-o-nikhat-o-gul ke hujum mein

shama o sarw o baada-o-paimana chahiye

phir us ki chashm-e-mast pe gesu hon pur-fishan

phir abr-e-sham-gun sar-e-mai-KHana chahiye

phir chandni mein daman-e-dariya ye ai nadim

raqs-e-sharab-o-gardish-e-paimana chahiye

josh-e-tarab ne hashr sa dil mein kiya bapa

phir be-KHudi ko girya-e-mastana chahiye

'aKHtar' watan mein aa ke khula hai ye husn-e-raaz

is muKHtasar si umr mein kya kya na chahiye