nehru

maiñ ne tanhā kabhī us ko dekhā nahīñ

phir bhī jab us ko dekhā vo tanhā milā

jaise sahrā meñ chashma kahīñ

yā samundar meñ mīnār-e-nūr

yā koī fikr-e-auhām meñ

fikr sadiyoñ akelī akelī rahī

zehn sadiyoñ akelā akelā milā

aur akelā akelā bhaTaktā rahā

har na.e har purāne zamāne meñ vo

be-zabāñ tīrgī meñ kabhī

aur kabhī chīḳhtī dhuup meñ

chāñdnī meñ kabhī ḳhvāb kī

us kī taqdīr thī ik musalsal talāsh

ḳhud ko DhūñDā kiyā har fasāne meñ vo

bojh se apne us kī kamar jhuk ga.ī

qad magar aur kuchh aur baḌhtā rahā

ḳhair-o-shar kī koī jañg ho

zindagī kā ho koī jihād

vo hamesha huā sab se pahle shahīd

sab se pahle vo suulī pe chaḌhtā rahā

jin taqāzoñ ne us ko diyā thā janam

un kī āġhosh meñ phir samāyā na vo

ḳhuun meñ ved gūñje hue

aur jabīñ par farozāñ azaañ

aur siine pe raqsāñ salīb

be-jhijhak sab ke qaabū meñ aayā na vo

haath meñ us ke kyā thā jo detā hameñ

sirf ik kiil us kiil kā ik nishāñ

nashsha-e-mai koī chiiz hai

ik ghaḌī do ghaḌī ek raat

aur hāsil vahī dard-e-sar

us ne zindāñ meñ lekin piyā thā jo zahr

uTh ke siine se baiThā na is kā dhuāñ

main ne tanha kabhi us ko dekha nahin

phir bhi jab us ko dekha wo tanha mila

jaise sahra mein chashma kahin

ya samundar mein minar-e-nur

ya koi fikr-e-auham mein

fikr sadiyon akeli akeli rahi

zehn sadiyon akela akela mila

aur akela akela bhaTakta raha

har nae har purane zamane mein wo

be-zaban tirgi mein kabhi

aur kabhi chiKHti dhup mein

chandni mein kabhi KHwab ki

us ki taqdir thi ek musalsal talash

KHud ko DhunDa kiya har fasane mein wo

bojh se apne us ki kamar jhuk gai

qad magar aur kuchh aur baDhta raha

KHair-o-shar ki koi jang ho

zindagi ka ho koi jihad

wo hamesha hua sab se pahle shahid

sab se pahle wo suli pe chaDhta raha

jin taqazon ne us ko diya tha janam

un ki aaghosh mein phir samaya na wo

KHun mein wed gunje hue

aur jabin par farozan azan

aur sine pe raqsan salib

be-jhijhak sab ke qabu mein aaya na wo

hath mein us ke kya tha jo deta hamein

sirf ek kil us kil ka ek nishan

nashsha-e-mai koi chiz hai

ek ghaDi do ghaDi ek raat

aur hasil wahi dard-e-sar

us ne zindan mein lekin piya tha jo zahr

uTh ke sine se baiTha na is ka dhuan