nelson mandela ke nam

ai mañdela tirī bebāk qayādat ko salām

sach hai insān kī tauqīr baḌhā dī tū ne

tā-abad yaad rahegī ye misālī paikār

qil.a-e-zulm kī buniyād hilā dī tū ne

ye tirī jehd-e-musalsal ye tirā azm-e-samīm

sham.a tūfān-e-havādis meñ jalā dī tū ne

aaj africa ke sab pīr-o-javāñ haiñ bedār

qismat-e-ḳhufta ġhulāmoñ kī jagā dī tū ne

zor-e-bāzū ne tire aaj baḌā kaam kiyā

gardan-e-ḳhvājgī pal-bhar meñ jhukā dī tū ne

jo thī insān pe insāñ ke sitam kī buniyād

past-o-bālā kī vo tafrīq miTā dī tū ne

tū ne shāhīñ se mamūle ko laḌāyā ai dost

ḳhaak meñ haibat-e-afrang milā dī tū ne

ai mire mard-e-mujāhid tirī jur.at ke nisār

rang aur nasl kī dīvār girā dī tū ne

dekh hai vaqt kī maujoñ meñ ravānī tujh se

zinda hai azmat-e-insāñ kī kahānī tujh se

ai mandela teri bebak qayaadat ko salam

sach hai insan ki tauqir baDha di tu ne

ta-abad yaad rahegi ye misali paikar

qila-e-zulm ki buniyaad hila di tu ne

ye teri jehd-e-musalsal ye tera azm-e-samim

shama tufan-e-hawadis mein jala di tu ne

aaj africa ke sab pir-o-jawan hain bedar

qismat-e-KHufta ghulamon ki jaga di tu ne

zor-e-bazu ne tere aaj baDa kaam kiya

gardan-e-KHwajgi pal-bhar mein jhuka di tu ne

jo thi insan pe insan ke sitam ki buniyaad

past-o-baala ki wo tafriq miTa di tu ne

tu ne shahin se mamule ko laDaya ai dost

KHak mein haibat-e-afrang mila di tu ne

ai mere mard-e-mujahid teri jurat ke nisar

rang aur nasl ki diwar gira di tu ne

dekh hai waqt ki maujon mein rawani tujh se

zinda hai azmat-e-insan ki kahani tujh se