sal-e-nau

ab raat Dhal rahī hai koī do kā vaqt hai

āñkhoñ meñ niiñd jhuul rahī hai abhī talak

lekin maiñ sāl-e-nau ke liye jāgtā rahūñ

ummīd ke charāġh jalā.ūñ na.e na.e

baiThā huuñ ḳhāmushī kī navāoñ ko chheḌ kar

apne ġhamoñ se aaj bhī fursat nahīñ mujhe

palkoñ pe aaj bhī to larazte haiñ ye diye

lekin unhīñ ġhamoñ se nayā āstāñ banā

vaj.h-e-sukūñ hai aaj ḳhayāl-e-gurez-pā

TuuTe hue diloñ ko sahārā bhī de sakā

jab dil kī dhaḌkanoñ se mile dars-e-āgahī

phir kis liye junūñ meñ koī intishār ho

nā-kāmiyāñ hayāt kī sharmā na jā.eñgī

is des kī fazāoñ se gar ham ko pyaar ho

in mai-kadoñ se kal bhī na thā mujh ko vāsta

jin meñ lahū ke jaam uThāte haiñ hukmarāñ

ehsās kī nigāh magar dekhtī hai ab

kuchh aur tez-gām huā kārvān-e-shauq

aur sāl-e-nau bhī saath isī kārvāñ ke hai

in jhoñpaḌoñ meñ aaj charāġhāñ nahīñ to kyā

do-chār saal aur bhī imkāñ nahīñ to kyā

fasl-e-bahār aa.egī jhūmeñgī Dāliyāñ

phūloñ meñ paat paat meñ rañgat samā.egī

hoñge kabhī to jām-ba-kaf ḳhās-o-ām sab

har har nigāh sāġhar-o-mīnā uThā.egī

zulf-e-hayāt shauq se parcham uḌā.egī

maiñ aaj sāl-e-nau ke liye jāgtā rahūñ

ummīd ke charāġh jalā.ūñ na.e na.e

ab raat Dhal rahi hai koi do ka waqt hai

aankhon mein nind jhul rahi hai abhi talak

lekin main sal-e-nau ke liye jagta rahun

ummid ke charagh jalaun nae nae

baiTha hun KHamushi ki nawaon ko chheD kar

apne ghamon se aaj bhi fursat nahin mujhe

palkon pe aaj bhi to larazte hain ye diye

lekin unhin ghamon se naya aastan bana

wajh-e-sukun hai aaj KHayal-e-gurez-pa

TuTe hue dilon ko sahaara bhi de saka

jab dil ki dhaDkanon se mile dars-e-agahi

phir kis liye junun mein koi intishaar ho

na-kaamiyan hayat ki sharma na jaengi

is des ki fazaon se gar hum ko pyar ho

in mai-kadon se kal bhi na tha mujh ko wasta

jin mein lahu ke jam uThate hain hukmaran

ehsas ki nigah magar dekhti hai ab

kuchh aur tez-gam hua karwan-e-shauq

aur sal-e-nau bhi sath isi karwan ke hai

in jhonpaDon mein aaj charaghan nahin to kya

do-chaar sal aur bhi imkan nahin to kya

fasl-e-bahaar aaegi jhumengi Daliyan

phulon mein pat pat mein rangat samaegi

honge kabhi to jam-ba-kaf KHas-o-am sab

har har nigah saghar-o-mina uThaegi

zulf-e-hayat shauq se parcham uDaegi

main aaj sal-e-nau ke liye jagta rahun

ummid ke charagh jalaun nae nae