nili gard ka zamzam

maiñ taḳhayyul ke tashaddud kā shikār

dekhtā huuñ āsmāñ se saaya saaya chīthḌe girte hue

sun rahā huuñ

faḌfaḌātī dhuup kī piilī sadā

dard kī būḌhī chuḌeleñ

aañkh ke sahrā meñ apnī retlī āvāz meñ sab ko pukāreñ

aao aao

maiñ akelā apne sannāTe meñ gird-o-pesh ke āshob meñ khoyā huā

chal rahā huuñ

rāste ke sañg-reze aañkh se chunte hue

taaki pathrā.ī huī mar mar kī saḌkeñ rafta rafta mere paañv chaaT leñ

chal rahā huuñ

jaane kis jānib mujhe jaanā hai kyuuñ jaanā hai

shāyad fāsloñ kī intihā uftādgī hai

aur shāyad manzileñ is vāhime kī maut kī manzar haiñ

jo taaza lahū ke ā.īne kā aks hai

aur kyā mālūm ye bhī vāhima ho

kaash koī lafz apnī band muTThī khol de

aur kāġhaz par bichhī satroñ kā jaal

mujh pe chāroñ samt se aa kar gire

kyā ḳhabar āzād ho jā.ūñ vadaq riit ke kohrām se

chīḳhtī chīleñ zamīñ se saaya saaya chīthaḌoñ ko le uḌeñ

aur maiñ miTTī kī nañgī god meñ leTe hue

āsmāñ ko apne uupar oḌh luuñ

main taKHayyul ke tashaddud ka shikar

dekhta hun aasman se saya saya chithDe girte hue

sun raha hun

faDfaDati dhup ki pili sada

dard ki buDhi chuDelen

aankh ke sahra mein apni retli aawaz mein sab ko pukaren

aao aao

main akela apne sannaTe mein gird-o-pesh ke aashob mein khoya hua

chal raha hun

raste ke sang-reze aankh se chunte hue

taki pathrai hui mar mar ki saDken rafta rafta mere panw chaT len

chal raha hun

jaane kis jaanib mujhe jaana hai kyun jaana hai

shayad faslon ki intiha uftadgi hai

aur shayad manzilen is wahime ki maut ki manzar hain

jo taza lahu ke aaine ka aks hai

aur kya malum ye bhi wahima ho

kash koi lafz apni band muTThi khol de

aur kaghaz par bichhi satron ka jal

mujh pe chaaron samt se aa kar gire

kya KHabar aazad ho jaun wadaq rit ke kohram se

chiKHti chilen zamin se saya saya chithaDon ko le uDen

aur main miTTi ki nangi god mein leTe hue

aasman ko apne upar oDh lun