nind

raat ḳhūb-sūrat hai

niiñd kyuuñ nahīñ aatī

din kī ḳhashm-gīñ nazreñ

kho ga.iiñ siyāhī meñ

āhanī kaḌoñ kā shor

beḌiyoñ kī jhankāreñ

qaidiyoñ kī sāñsoñ kī

tund-o-tez āvāzeñ

jelaroñ kī badkārī

gāliyoñ kī bauchhāreñ

bebasī kī ḳhāmoshī

ḳhāmushī kī fariyādeñ

tah-nashīñ añdhere meñ

shab kī shoḳh doshīza

ḳhār-dār tāroñ ko

āhanī hisāroñ ko

paar kar ke aa.ī hai

bhar ke apne āñchal meñ

jañgaloñ kī ḳhushbueñ

ThanDkeñ pahāḌoñ kī

mere paas laa.ī hai

nīl-gūñ javāñ siina

kahkashāñ kī peshānī

niim chāñd kā joḌā

maḳhmalīñ añdhere kā

pairahan laraztā hai

vaqt kī siyah zulfeñ

ḳhāmushī ke shānoñ par

ḳham-ba-ḳham mahaktī haiñ

aur zamīñ ke hoñToñ par

narm shabnamī bose

motiyoñ ke dāñtoñ se

khilkhilā ke hañste haiñ

raat ḳhūb-sūrat hai

niiñd kyuuñ nahīñ aatī

raat peñg letī hai

chāñdnī ke jhūle meñ

āsmān par taare

nanhe nanhe hāthoñ se

bun rahe haiñ jaadū sā

jhīñguroñ kī āvāzeñ

kah rahī haiñ afsāna

duur jel ke bāhar

baj rahī hai shahnā.ī

rail apne pahiyoñ se

loriyāñ sunātī hai

raat ḳhūb-sūrat hai

niiñd kyuuñ nahīñ aatī

roz raat ko yūñhī

niiñd merī āñkhoñ se

bevafā.ī kartī hai

mujh ko chhoḌ kar tanhā

jel se nikaltī hai

bamba.ī kī bastī meñ

mere ghar kā darvāza

jā ke khaTkhaTātī hai

ek nanhe bachche kī

añkhḌiyoñ ke bachpan meñ

mīThe mīThe ḳhvāboñ kā

shahad ghol detī hai

ik hasīñ parī ban kar

loriyāñ sunātī hai

pālnā hilātī hai

raat KHub-surat hai

nind kyun nahin aati

din ki KHashm-gin nazren

kho gain siyahi mein

aahani kaDon ka shor

beDiyon ki jhankaren

qaidiyon ki sanson ki

tund-o-tez aawazen

jelaron ki badkari

galiyon ki bauchhaaren

bebasi ki KHamoshi

KHamushi ki fariyaaden

tah-nashin andhere mein

shab ki shoKH doshiza

KHar-dar taron ko

aahani hisaron ko

par kar ke aai hai

bhar ke apne aanchal mein

jangalon ki KHushbuen

ThanDken pahaDon ki

mere pas lai hai

nil-gun jawan sina

kahkashan ki peshani

nim chand ka joDa

maKHmalin andhere ka

pairahan larazta hai

waqt ki siyah zulfen

KHamushi ke shanon par

KHam-ba-KHam mahakti hain

aur zamin ke honTon par

narm shabnami bose

motiyon ke danton se

khilkhila ke hanste hain

raat KHub-surat hai

nind kyun nahin aati

raat peng leti hai

chandni ke jhule mein

aasman par tare

nanhe nanhe hathon se

bun rahe hain jadu sa

jhinguron ki aawazen

kah rahi hain afsana

dur jel ke bahar

baj rahi hai shahnai

rail apne pahiyon se

loriyan sunati hai

raat KHub-surat hai

nind kyun nahin aati

roz raat ko yunhi

nind meri aankhon se

bewafai karti hai

mujh ko chhoD kar tanha

jel se nikalti hai

bambai ki basti mein

mere ghar ka darwaza

ja ke khaTkhaTati hai

ek nanhe bachche ki

ankhDiyon ke bachpan mein

miThe miThe KHwabon ka

shahad ghol deti hai

ek hasin pari ban kar

loriyan sunati hai

palna hilati hai