nind

ye kis paikar kī rañgīnī simaT kar dil meñ aatī hai

mirī be-kaif tanhā.ī ko yuuñ rañgīñ banātī hai

ye kis kī jumbish-e-mizhgāñ raubāb-e-dil ko chhūtī hai

ye kis ke pairahan kī sarsarāhaT gungunātī hai

mirī āñkhoñ meñ kis kī shoḳhī-e-lab kā tasavvur hai

ki jis ke kaif se āñkhoñ meñ merī niiñd aatī hai

sukūt aur shāñtī ke har qadam par phuul barsātī

asīr-e-kākul-e-shab-gūñ banā kar muskurātī hai

mirī āñkhoñ meñ ghul jaatī hai vo kaif-e-nazar ban kar

mujhe qaus-e-quzah kī chhāñv meñ pahroñ sulātī hai

sahar tak vo mujhe chimTā.e rakhtī hai kaleje se

dabe paañv kiran ḳhurshīd kī aa kar jagātī hai

ye kis paikar ki rangini simaT kar dil mein aati hai

meri be-kaif tanhai ko yun rangin banati hai

ye kis ki jumbish-e-mizhgan raubab-e-dil ko chhuti hai

ye kis ke pairahan ki sarsarahaT gungunati hai

meri aankhon mein kis ki shoKHi-e-lab ka tasawwur hai

ki jis ke kaif se aankhon mein meri nind aati hai

sukut aur shanti ke har qadam par phul barsati

asir-e-kakul-e-shab-gun bana kar muskuraati hai

meri aankhon mein ghul jati hai wo kaif-e-nazar ban kar

mujhe qaus-e-quzah ki chhanw mein pahron sulati hai

sahar tak wo mujhe chimTae rakhti hai kaleje se

dabe panw kiran KHurshid ki aa kar jagati hai