nostalgia

biis baras vo purānī shirt

niklī hai almārī se

maiñ ne tah kar ke us ko

almārī ke sab se uupar vaale ḳhāne meñ rakkhā thā

jaise merī būḌhī maañ qur.ān ko chuum ke rakhtī thī

terī yādoñ ke parfum ke dhabbe paḌe haiñ ab tak

aur maiñ chhū kar dekhūñ to

ḳhushbū bhī ab tak ga.ī nahīñ hai

vaqt is shirt kī āstīn kā ghusā huā hai

bas maiñ āḳhirī baar jo terā ticket liyā thā

jeb meñ ab tak paḌā huā hai

tū ne āḳhirī baar baTan Tāñkā thā is meñ

yaad hai jānāñ

daañt se dhāga toḌ ke kaise

soī chubhoī thī siine meñ

us kī Tīseñ aaj bhī mere

dil meñ rah rah kar uThtī haiñ

sab kuchh itnā hī taaza hai

maiñ ne shirt sambhāl ke rakkhī

vaqt ko maiñ ne rok ke rakkhā

sab kuchh vaise kā vaisā hai

lekin jānāñ

ye to batā tū

shirt ke collar par jo terī

kaalī zulf kā baal Tikā thā

us par safedī kaise aa.ī

bis baras wo purani shirt

nikli hai almari se

main ne tah kar ke us ko

almari ke sab se upar wale KHane mein rakkha tha

jaise meri buDhi man quran ko chum ke rakhti thi

teri yaadon ke parfum ke dhabbe paDe hain ab tak

aur main chhu kar dekhun to

KHushbu bhi ab tak gai nahin hai

waqt is shirt ki aastin ka ghusa hua hai

bas main aaKHiri bar jo tera ticket liya tha

jeb mein ab tak paDa hua hai

tu ne aaKHiri bar baTan Tanka tha is mein

yaad hai jaanan

dant se dhaga toD ke kaise

soi chubhoi thi sine mein

us ki Tisen aaj bhi mere

dil mein rah rah kar uThti hain

sab kuchh itna hi taza hai

main ne shirt sambhaal ke rakkhi

waqt ko main ne rok ke rakkha

sab kuchh waise ka waisa hai

lekin jaanan

ye to bata tu

shirt ke collar par jo teri

kali zulf ka baal Tika tha

us par safedi kaise aai