nowember ke pahle hafte par ek nazm

ḳhunuk havā kā barahna hāthoñ se zard māthe se

pahlā pahlā mukālima hai

abhī ye din-rāt sard-mehrī ke itne ḳhūgar nahīñ hue haiñ

to phir ye be-vazn sub.h kyuuñ bojh ban rahī hai

savād-e-āġhāz-e-ḳhushk-sālī meñ kyuuñ varaq bhīgne lagā hai

dhuāñ dhuāñ shaam ke alaav meñ koī jañgal jale

ki rūThī huī tamannā

ḳhizāñ kā paanī koī ishāra nahīñ samajhtā

ye nahr ab tak purāne pahre meñ chal rahī hai

ajiib tāsīr āḳhir-e-shab ke āsmāñ kī

havā chale yā zamīn ghūme

fasīl kohre kī koī sūraj nahīñ girātā

zamīn se malba ga.e dinoñ kā koī sitāra nahīñ uThātā

tavīl rāteñ ki muḳhtasar din

kasīr va.ade qalīl umreñ

abas hisāb-o-shumār us kā jo gosht is saal nāḳhunoñ se judā huā hai

sikuḌte lamhe kī ek sarhad se tā-ba-hadd-e-digar vahī kār-e-satr-poshī

vo mū-e-tan ho ki tār-e-pamba ki bāl-o-par aks-e-ā.īna ke

har ek katran pe zardiyāñ bāñTne daraḳhtoñ ke faisle haiñ

udaas pattā

ḳhizāñ kā paanī na.e ma.ānī nahīñ samajhtā

so nahr ab tak purāne pahre meñ chal rahī hai

KHunuk hawa ka barahna hathon se zard mathe se

pahla pahla mukalima hai

abhi ye din-raat sard-mehri ke itne KHugar nahin hue hain

to phir ye be-wazn subh kyun bojh ban rahi hai

sawad-e-aghaz-e-KHushk-sali mein kyun waraq bhigne laga hai

dhuan dhuan sham ke alaw mein koi jangal jale

ki ruThi hui tamanna

KHizan ka pani koi ishaara nahin samajhta

ye nahr ab tak purane pahre mein chal rahi hai

ajib tasir aaKHir-e-shab ke aasman ki

hawa chale ya zamin ghume

fasil kohre ki koi suraj nahin giraata

zamin se malba gae dinon ka koi sitara nahin uThata

tawil raaten ki muKHtasar din

kasir wade qalil umren

abas hisab-o-shumar us ka jo gosht is sal naKHunon se juda hua hai

sikuDte lamhe ki ek sarhad se ta-ba-hadd-e-digar wahi kar-e-satr-poshi

wo mu-e-tan ho ki tar-e-pamba ki baal-o-par aks-e-aina ke

har ek katran pe zardiyan banTne daraKHton ke faisle hain

udas patta

KHizan ka pani nae maani nahin samajhta

so nahr ab tak purane pahre mein chal rahi hai