numaish mein

vo kuchh doshīzgān-e-nāz-parvar

khaḌī haiñ ik bisātī kī dukāñ par

nazar ke sāmne hai ek mahshar

aur ik mahshar hai mere dil ke andar

sunahrā kaam rañgīñ sā.riyoñ par

bisāt-e-āsmāñ par māh-o-aḳhtar

jamāl-o-husn ke pur-ro.ab tevar

numāyāñ chāñd sī peshāniyoñ par

vo ruḳhsāroñ pe halkī halkī surḳhī

laboñ meñ pur-fishāñ rūh-e-gul-e-tar

siyah zulfoñ meñ rūh-e-sumbulistāñ

nazar sar-chashma-e-tasnīm-o-kausar

adā-e-nāz ġharq-e-kaif-e-sahbā

siyah mizhgāñ sharāb-ālūda nashtar

chamak tāroñ kī chashm-e-surmagīñ meñ

jhalak chāñdī kī jism-e-marmarīñ meñ

vo ḳhushbū aa rahī hai pairahan se

fazā hai duur tak jis se mo.attar

tabassum aur hañsī ke narm tūfāñ

fazāoñ meñ musalsal bārish-e-zar

nishāt-e-rañg-o-bū se chuur āñkheñ

sharāb-e-nāb se labrez sāġhar

vo mehrābeñ sī sīnoñ par numāyāñ

fazā-e-nūr meñ cupid ke shah-par

nafas ke āmad-o-shud se talātum

shab-e-mahtāb meñ jaise samundar

sitāroñ kī nigāheñ jhuk ga.ī haiñ

zamīñ phir ḳhanda-zan hai āsmāñ par

koī ā.īna-dār-e-husn-e-fāras

kisī meñ husn-e-yūnānī ke jauhar

kisī meñ aks-e-''ma.asūm-e-kalīsā''

kisī meñ partav-e-asnām-e-āzar

ye shīrīñ hai vo naushāba hai shāyad

nahīñ yaañ farq-e-farhād-o-sikandar

ye apne husn meñ azrā-e-vāmiq

vo apne naaz meñ salmā-e-'aḳhtar'

ye tābānī meñ ḳhurshīd-e-daraḳhshāñ

vo ra.anā.ī meñ us se bhī fuzūñ-tar

hañsī us kī tulū-e-sub.h-e-ḳhandāñ

navā us kī surūd-e-kaif-āvar

ye sholā-āfrīñ vo barq-afgan

ye ā.īña-jabīñ vo māh-paikar

vo jumbish sī huī kuchh āñchaloñ ko

vo lahreñ sī uThīñ kuchh sā.riyoñ par

ḳhirām-e-nāz se naġhme jagātī

vo chal diiñ ek jānib muskurā kar

kisī kī hasrateñ pāmāl kartī

kisī kī hasrateñ ham-rāh le kar

kabhī āñkheñ dukānoñ par jamī haiñ

kabhī ḳhud apnī hī barnāiyoñ par

idhar ham ne ik āh-e-sard khīñchī

hañsī phir aa ga.ī apne kiye par

wo kuchh doshizgan-e-naz-parwar

khaDi hain ek bisati ki dukan par

nazar ke samne hai ek mahshar

aur ek mahshar hai mere dil ke andar

sunahra kaam rangin sariyon par

bisat-e-asman par mah-o-aKHtar

jamal-o-husn ke pur-roab tewar

numayan chand si peshaniyon par

wo ruKHsaron pe halki halki surKHi

labon mein pur-fishan ruh-e-gul-e-tar

siyah zulfon mein ruh-e-sumbulistan

nazar sar-chashma-e-tasnim-o-kausar

ada-e-naz gharq-e-kaif-e-sahba

siyah mizhgan sharab-aluda nashtar

chamak taron ki chashm-e-surmagin mein

jhalak chandi ki jism-e-marmarin mein

wo KHushbu aa rahi hai pairahan se

faza hai dur tak jis se moattar

tabassum aur hansi ke narm tufan

fazaon mein musalsal barish-e-zar

nishat-e-rang-o-bu se chur aankhen

sharab-e-nab se labrez saghar

wo mehraben si sinon par numayan

faza-e-nur mein cupid ke shah-par

nafas ke aamad-o-shud se talatum

shab-e-mahtab mein jaise samundar

sitaron ki nigahen jhuk gai hain

zamin phir KHanda-zan hai aasman par

koi aaina-dar-e-husn-e-faras

kisi mein husn-e-yunani ke jauhar

kisi mein aks-e-masum-e-kalisa

kisi mein partaw-e-asnam-e-azar

ye shirin hai wo naushaba hai shayad

nahin yan farq-e-farhad-o-sikandar

ye apne husn mein azra-e-wamiq

wo apne naz mein salma-e-'aKHtar'

ye tabani mein KHurshid-e-daraKHshan

wo ranai mein us se bhi fuzun-tar

hansi us ki tulu-e-subh-e-KHandan

nawa us ki surud-e-kaif-awar

ye shola-afrin wo barq-afgan

ye aaina-jabin wo mah-paikar

wo jumbish si hui kuchh aanchalon ko

wo lahren si uThin kuchh sariyon par

KHiram-e-naz se naghme jagati

wo chal din ek jaanib muskura kar

kisi ki hasraten pamal karti

kisi ki hasraten ham-rah le kar

kabhi aankhen dukanon par jami hain

kabhi KHud apni hi barnaiyon par

idhar hum ne ek aah-e-sard khinchi

hansi phir aa gai apne kiye par