numu

maiñ vo shajar thā

ki mere saa.e meñ baiThne aur shāḳhoñ pe jhūlne kī hazāroñ jismoñ ko aarzū thī

zamīñ kī āñkheñ darāzi-e-umar kī duāoñ meñ ro rahī thiiñ

aur sūraj ke haath thakte nahīñ the mujh ko sañvārne meñ

ki maiñ ik āvāz kā safar thā

ajab shajar thā

ki us musāfir kā muntazir thā

jo mere saa.e meñ aa ke baiThe to phir na uTThe

jo merī shāḳhoñ pe aa.e jhūle to saare mausam yahīñ guzāre

magar vo pāgal havā kā jhoñkā magar vo pāgal havā kā jhoñkā

ajab musāfir thā rahguzar kā

jo chhoḌ aayā thā kitnī shāḳheñ

magar lagā yuuñ ki jaise ab vo shikasta-tar hai

vo mere ḳhvāboñ kā ham-safar hai

so maiñ ne saa.e bichhā diye the

tamām jhūle hilā diye the

magar vo pāgal havā kā jhoñkā magar vo pāgal havā kā jhoñkā

ajab musāfir thā rahguzar thā

ki lamhe bhar meñ guzar chukā thā

maiñ be-numū aur be-samar thā

magar maiñ āvāz kā safar thā

so merī āvāz kā ajar thā

ajab shajar thā

ajab shajar huuñ

ki aane vaale sah kah rahā huuñ

ai mere dil meñ utarne vaale

ai mujh ko shādāb karne vaale

tujhe mirī raushnī mubārak

tujhe mirī zindagī mubārak

main wo shajar tha

ki mere sae mein baiThne aur shaKHon pe jhulne ki hazaron jismon ko aarzu thi

zamin ki aankhen daraazi-e-umar ki duaon mein ro rahi thin

aur suraj ke hath thakte nahin the mujh ko sanwarne mein

ki main ek aawaz ka safar tha

ajab shajar tha

ki us musafir ka muntazir tha

jo mere sae mein aa ke baiThe to phir na uTThe

jo meri shaKHon pe aae jhule to sare mausam yahin guzare

magar wo pagal hawa ka jhonka magar wo pagal hawa ka jhonka

ajab musafir tha rahguzar ka

jo chhoD aaya tha kitni shaKHen

magar laga yun ki jaise ab wo shikasta-tar hai

wo mere KHwabon ka ham-safar hai

so main ne sae bichha diye the

tamam jhule hila diye the

magar wo pagal hawa ka jhonka magar wo pagal hawa ka jhonka

ajab musafir tha rahguzar tha

ki lamhe bhar mein guzar chuka tha

main be-numu aur be-samar tha

magar main aawaz ka safar tha

so meri aawaz ka ajar tha

ajab shajar tha

ajab shajar hun

ki aane wale sah kah raha hun

ai mere dil mein utarne wale

ai mujh ko shadab karne wale

tujhe meri raushni mubarak

tujhe meri zindagi mubarak