nuqush-e-mazi

nazar meñ shā.er ke phir rahā hai, harā-bharā pur-bahār jañgal

vo sub.h-e-rañgīñ, vo kaif-e-manzar, vo dāman-e-koh bindhiyā-chal

milī thī ik rañg-o-bū kī duniyā, tamām sahrā chaman chaman thā

magar vo jannat-nigāh vaadī bahār kā mustaqil vatan thā

khaḌā huā thā ġharīb shā.er, ḳhamosh sahra-e-rañg-o-bū meñ

machal rahī thī sahar kī doshīza shab ke āġhosh-e-ārzū meñ

hoñ chashm-e-āshiq meñ jaise āñsū, sitāre yuuñ jhilmilā rahe the

falak pe barham thī bazm-e-anjum, charāġh gul hote jā rahe the

tajalliyoñ kī falak se bārish thii, zulmat-e-shab bikhar rahī thī

ki sub.h kī sāñvlī hasīna nahā rahī thii, nikhar rahī thī

nadī meñ halkā sā thā tamavvuj kaheñ jise be-qarār ġhaflat

ki niiñd meñ jaise karvaTeñ le, javān, bad-mast-e-ḳhvāb aurat

havā jo shāna hilā rahī thii, to maujeñ hushiyār ho rahī thiiñ

tuyūr ke mast zamzamoñ se fazā.eñ bedār ho rahī thiiñ

ye kaifiyat thī aur ek jogan sitār baiThī bajā rahī thī

magar vo jañgal kī shāhzādī bahār ke giit gā rahī thī

bahār ke giit gā rahī thī fazā meñ naġhme bikhertī thī

sukūt fitrat kā daad detā thā ruḳh jidhar ko vo phertī thī

vo niiñd se muzmahil nigāheñ vo lab pe maġhmūm muskurāhaT

hazār andāz-e-dil-rubā.ī aur ek ma.asūm muskurāhaT

thiiñ niiñd se rasmasā.ī āñkheñ aur in meñ shoḳhī machal rahī thī

ḳhumār-ālūda añkhḌiyoñ meñ bahār kī ruuh pal rahī thī

qamar kī tal.at, shafaq kī surḳhī, jabīñ pe sub.h-e-bahār ḳhandāñ

nigāh ā.īna-dār-e-manzar, jamāl parvarda-e-byābāñ

sitār pe nāzuk uñgliyāñ thīñ, kalā.ī gorī lachak rahī thī

umañgeñ letī thiiñ dil meñ karvaT, rag-e-javānī phaḌak rahī thī

sunahre jalvoñ kī chhūT Daalī jo shāh-e-ḳhāvar ke tāj-e-zar ne

talā.ī afshāñ chunī jabīñ par malīh doshīza-e-sahar ne

talā.ī zevar se aur chamkī urūs-e-manzar kī dilrubā.ī

uThā jo sūraj to dhuup niklī hasīna-e-subh khilkilā.ī

fazā kī tabdīliyoñ ko dekhā jo bazm-e-fitrat kī mutriba ne

sitār rakkhā, uThā.ī gagrī, nadī kināre chalī nahāne

vo jā rahī thī nadī kī jānib maiñ lauT kar ghar ko aa rahā thā

sitār ḳhāmosh ho chukā thā magar ye dil gungunā rahā thā

zamāna guzrā nuqūsh-e-māzī ḳhayāl se miTte jā rahe haiñ

magar vo naġhme 'jamīl' ab tak dimāġh ko gudgudā rahe haiñ

nazar mein shaer ke phir raha hai, hara-bhara pur-bahaar jangal

wo subh-e-rangin, wo kaif-e-manzar, wo daman-e-koh bindhiya-chal

mili thi ek rang-o-bu ki duniya, tamam sahra chaman chaman tha

magar wo jannat-nigah wadi bahaar ka mustaqil watan tha

khaDa hua tha gharib shaer, KHamosh sahra-e-rang-o-bu mein

machal rahi thi sahar ki doshiza shab ke aaghosh-e-arzu mein

hon chashm-e-ashiq mein jaise aansu, sitare yun jhilmila rahe the

falak pe barham thi bazm-e-anjum, charagh gul hote ja rahe the

tajalliyon ki falak se barish thi, zulmat-e-shab bikhar rahi thi

ki subh ki sanwli hasina naha rahi thi, nikhar rahi thi

nadi mein halka sa tha tamawwuj kahen jise be-qarar ghaflat

ki nind mein jaise karwaTen le, jawan, bad-mast-e-KHwab aurat

hawa jo shana hila rahi thi, to maujen hushiyar ho rahi thin

tuyur ke mast zamzamon se fazaen bedar ho rahi thin

ye kaifiyat thi aur ek jogan sitar baiThi baja rahi thi

magar wo jangal ki shahzadi bahaar ke git ga rahi thi

bahaar ke git ga rahi thi faza mein naghme bikherti thi

sukut fitrat ka dad deta tha ruKH jidhar ko wo pherti thi

wo nind se muzmahil nigahen wo lab pe maghmum muskurahaT

hazar andaz-e-dil-rubai aur ek masum muskurahaT

thin nind se rasmasai aankhen aur in mein shoKHi machal rahi thi

KHumar-aluda ankhDiyon mein bahaar ki ruh pal rahi thi

qamar ki talat, shafaq ki surKHi, jabin pe subh-e-bahaar KHandan

nigah aaina-dar-e-manzar, jamal parwarda-e-byaban

sitar pe nazuk ungliyan thin, kalai gori lachak rahi thi

umangen leti thin dil mein karwaT, rag-e-jawani phaDak rahi thi

sunahre jalwon ki chhuT Dali jo shah-e-KHawar ke taj-e-zar ne

talai afshan chuni jabin par malih doshiza-e-sahar ne

talai zewar se aur chamki urus-e-manzar ki dilrubai

uTha jo suraj to dhup nikli hasina-e-subh khilkilai

faza ki tabdiliyon ko dekha jo bazm-e-fitrat ki mutriba ne

sitar rakkha, uThai gagri, nadi kinare chali nahane

wo ja rahi thi nadi ki jaanib main lauT kar ghar ko aa raha tha

sitar KHamosh ho chuka tha magar ye dil gunguna raha tha

zamana guzra nuqush-e-mazi KHayal se miTte ja rahe hain

magar wo naghme 'jamil' ab tak dimagh ko gudguda rahe hain