nur-jahan

har jalva jahāñgīr thā jis vaqt javāñ thī

kahte haiñ jise nūr-jahāñ nūr-e-jahāñ thī

thā huur kā TukḌā but-e-tannāz kā mukhḌā

ik sham.a thī fānūs meñ jo nūr-fishāñ thī

andāz meñ shoḳhī meñ karishme meñ adā meñ

talvār thī barchhī thī kaTārī thī sināñ thī

ruḳhsār-e-jahāñ-tāb kī paḌtī thiiñ shuā.eñ

yā husn ke dariyā se koī mauj ravāñ thī

bijlī thī chamaktī huī dāmāñ-e-shafaq meñ

yā mauj-e-tabassum thī laboñ meñ jo nihāñ thī

gulzār-e-ma.ānī kī chahaktī huī bulbul

shā.ir thī suḳhan-sanj thī ejāz-e-bayāñ thī

betāb huā jaatā hai dil zikr se us ke

kyā pūchhte ho kaun thī vo aur kahāñ thī

duniyā-e-tadabbur meñ thī yaktā-e-zamāna

haath us ke the aur un meñ hukūmat kī inaañ thī

dastūr-e-adālat ke liye us kā qalam thā

farmān-e-re.āyā ke liye us kī zabāñ thī

vo sham-e-shab-afroz thī parvāna jahāñgīr

ye baat bhī donoñ kī mohabbat se ayaañ thī

lahore meñ dekhā use madfūñ tah-e-marqad

gard-e-kaf-e-pā jis kī kabhī kāhkashāñ thī

paivand-e-zamīñ ho ga.e ab kaun batā.e

'kaifī' ye jahāñgīr thā vo nūr-jahāñ thī

har jalwa jahangir tha jis waqt jawan thi

kahte hain jise nur-jahan nur-e-jahan thi

tha hur ka TukDa but-e-tannaz ka mukhDa

ek shama thi fanus mein jo nur-fishan thi

andaz mein shoKHi mein karishme mein ada mein

talwar thi barchhi thi kaTari thi sinan thi

ruKHsar-e-jahan-tab ki paDti thin shuaen

ya husn ke dariya se koi mauj rawan thi

bijli thi chamakti hui daman-e-shafaq mein

ya mauj-e-tabassum thi labon mein jo nihan thi

gulzar-e-maani ki chahakti hui bulbul

shair thi suKHan-sanj thi ejaz-e-bayan thi

betab hua jata hai dil zikr se us ke

kya puchhte ho kaun thi wo aur kahan thi

duniya-e-tadabbur mein thi yakta-e-zamana

hath us ke the aur un mein hukumat ki inan thi

dastur-e-adalat ke liye us ka qalam tha

farman-e-reaya ke liye us ki zaban thi

wo sham-e-shab-afroz thi parwana jahangir

ye baat bhi donon ki mohabbat se ayan thi

lahore mein dekha use madfun tah-e-marqad

gard-e-kaf-e-pa jis ki kabhi kahkashan thi

paiwand-e-zamin ho gae ab kaun batae

'kaifi' ye jahangir tha wo nur-jahan thi