nura

vo nau-ḳhez nuurā vo ik bint-e-maryam

vo maḳhmūr āñkheñ vo gesu-e-pur-ḳham

vo arz-e-kalīsā kī ik māh-pāra

vo dair-o-haram ke liye ik sharāra

vo firdaus-e-maryam kā ik ġhuncha-e-tar

vo taslīs kī duḳhtar-e-nek-aḳhtar

vo ik nurse thī chāra-gar jis ko kahiye

madāvā-e-dard-e-jigar jis ko kahiye

javānī se tiflī gale mil rahī thī

havā chal rahī thī kalī khil rahī thī

vo pur-ro.ab tevar vo shādāb chehra

matā-e-javānī pe fitrat kā pahra

mirī hukmarānī hai ahl-e-zamīñ par

ye tahrīr thā saaf us kī jabīñ par

safed aur shaffāf kapḌe pahan kar

mire paas aatī thī ik huur ban kar

vo ik āsmānī farishta thī goyā

ki andāz thā us meñ jibra.īl kā sā

vo ik marmarīñ huur ḳhuld-e-barīñ kī

vo ta.abīr aazar ke ḳhvāb-e-hasīñ kī

vo taskīn-e-dil thī sukūn-e-nazar thī

nigār-e-shafaq thī jamāl-e-nazar thī

vo sho.ala vo bijlī vo jalva vo partav

sulaimāñ kī vo ik kanīz-e-subuk-rau

kabhī us kī shoḳhī meñ sanjīdgī thī

kabhī us kī sanjīdgī meñ bhī shoḳhī

ghaḌī chup ghaḌī karne lagtī thī bāteñ

sirhāne mire kaaT detī thī rāteñ

ajab chiiz thī vo ajab raaz thī vo

kabhī soz thī vo kabhī saaz thī vo

naqāhat ke aalam meñ jab aañkh uThtī

nazar mujh ko aatī mohabbat kī devī

vo us vaqt ik paikar-e-nūr hotī

taḳhayyul kī parvāz se duur hotī

hañsātī thī mujh ko sulātī thī mujh ko

davā apne hāthoñ se mujh ko pilātī

ab achchhe ho har roz muzhda sunātī

sirhāne mire ek din sar jhukā.e

vo baiThī thī takiye pe kuhnī Tikā.e

ḳhayālāt-e-paiham meñ khoī huī sī

na jaagī huī sī na soī huī sī

jhapaktī huī baar baar us kī palkeñ

jabīñ par shikan be-qarār us kī palkeñ

vo āñkhoñ ke sāġhar chhalakte hue se

vo aariz ke sho.ale bhaḌakte hue se

laboñ meñ thā la.al-o-gohar kā ḳhazāna

nazar ārifāna adā rāhibāna

mahak gesuoñ se chalī aa rahī thī

mire har nafas meñ basī jā rahī thī

mujhe leTe leTe sharārat kī sūjhī

jo sūjhī bhī to kis qayāmat kī sūjhī

zarā baḌh ke kuchh aur gardan jhukā lī

lab-e-la.al-e-afshāñ se ik shai churā lī

vo shai jis ko ab kyā kahūñ kyā samajhiye

behisht-e-javānī kā tohfa samajhiye

sharāb-e-mohabbat kā ik jām-e-rañgīñ

subū-zār-e-fitrat kā ik jām-e-rañgīñ

maiñ samjhā thā shāyad bigaḌ jā.egī vo

havāoñ se laḌtī hai laḌ jā.egī vo

maiñ dekhūñgā us ke bipharne kā aalam

javānī kā ġhussa bikharne kā aalam

idhar dil meñ ik shor-e-mahshar bapā thā

magar us taraf rañg hī dūsrā thā

hañsī aur hañsī is tarah khilkhilā kar

ki sham-e-hayā rah ga.ī jhilmilā kar

nahīñ jāntī hai mirā naam tak vo

magar bhej detī hai paiġhām tak vo

ye paiġhām aate hī rahte haiñ akasr

ki kis roz aaoge bīmār ho kar

wo nau-KHez nura wo ek bint-e-maryam

wo maKHmur aankhen wo gesu-e-pur-KHam

wo arz-e-kalisa ki ek mah-para

wo dair-o-haram ke liye ek sharara

wo firdaus-e-maryam ka ek ghuncha-e-tar

wo taslis ki duKHtar-e-nek-aKHtar

wo ek nurse thi chaara-gar jis ko kahiye

madawa-e-dard-e-jigar jis ko kahiye

jawani se tifli gale mil rahi thi

hawa chal rahi thi kali khil rahi thi

wo pur-roab tewar wo shadab chehra

mata-e-jawani pe fitrat ka pahra

meri hukmarani hai ahl-e-zamin par

ye tahrir tha saf us ki jabin par

safed aur shaffaf kapDe pahan kar

mere pas aati thi ek hur ban kar

wo ek aasmani farishta thi goya

ki andaz tha us mein jibrail ka sa

wo ek marmarin hur KHuld-e-barin ki

wo tabir aazar ke KHwab-e-hasin ki

wo taskin-e-dil thi sukun-e-nazar thi

nigar-e-shafaq thi jamal-e-nazar thi

wo shoala wo bijli wo jalwa wo partaw

sulaiman ki wo ek kaniz-e-subuk-rau

kabhi us ki shoKHi mein sanjidgi thi

kabhi us ki sanjidgi mein bhi shoKHi

ghaDi chup ghaDi karne lagti thi baaten

sirhane mere kaT deti thi raaten

ajab chiz thi wo ajab raaz thi wo

kabhi soz thi wo kabhi saz thi wo

naqahat ke aalam mein jab aankh uThti

nazar mujh ko aati mohabbat ki dewi

wo us waqt ek paikar-e-nur hoti

taKHayyul ki parwaz se dur hoti

hansati thi mujh ko sulati thi mujh ko

dawa apne hathon se mujh ko pilati

ab achchhe ho har roz muzhda sunati

sirhane mere ek din sar jhukae

wo baiThi thi takiye pe kuhni Tikae

KHayalat-e-paiham mein khoi hui si

na jagi hui si na soi hui si

jhapakti hui bar bar us ki palken

jabin par shikan be-qarar us ki palken

wo aankhon ke saghar chhalakte hue se

wo aariz ke shoale bhaDakte hue se

labon mein tha lal-o-gohar ka KHazana

nazar aarifana ada rahibana

mahak gesuon se chali aa rahi thi

mere har nafas mein basi ja rahi thi

mujhe leTe leTe shararat ki sujhi

jo sujhi bhi to kis qayamat ki sujhi

zara baDh ke kuchh aur gardan jhuka li

lab-e-lal-e-afshan se ek shai chura li

wo shai jis ko ab kya kahun kya samajhiye

behisht-e-jawani ka tohfa samajhiye

sharab-e-mohabbat ka ek jam-e-rangin

subu-zar-e-fitrat ka ek jam-e-rangin

main samjha tha shayad bigaD jaegi wo

hawaon se laDti hai laD jaegi wo

main dekhunga us ke bipharne ka aalam

jawani ka ghussa bikharne ka aalam

idhar dil mein ek shor-e-mahshar bapa tha

magar us taraf rang hi dusra tha

hansi aur hansi is tarah khilkhila kar

ki sham-e-haya rah gai jhilmila kar

nahin jaanti hai mera nam tak wo

magar bhej deti hai paigham tak wo

ye paigham aate hi rahte hain akasr

ki kis roz aaoge bimar ho kar