online aashiq

net ījād huā hijr ke māroñ ke liye

search engine hai baḌī chiiz kuñvāroñ ke liye

jis ko sadma shab-e-tanhā.ī ke ayyām kā hai

aise āshiq ke liye net bahut kaam kā hai

net farhād ko shīrīñ se milā detā hai

ishq insān ko goggle pe biThā detā hai

kaam maktūb kā mouse se liyā jaatā hai

āh-e-sozāñ ko bhī upload kiyā jaatā hai

text meñ log mohabbat kī ḳhatā bhejte haiñ

ghar batāte nahīñ office kā patā bhejte haiñ

āshiqoñ kā ye nayā taur nayā Type hai

pahle chilman huā kartī thī ab skype hai

ishq kahte haiñ jise ik nayā samjhauta hai

pahle dil milte the ab naam click hotā hai

dil kā paiġhām jab email se mil jaatā hai

mel har chauk pe female se mil jaatā hai

ishq kā naam faqat āh-o-fuġhāñ thā pahle

Dāk-ḳhāne meñ ye ārām kahāñ thā pahle

iD jab se milī hai mujhe ham-sā.ī kī

achchhī lagtī hai tavālat shab-e-tanhā.ī kī

net pe log jo navve se palas hote haiñ

baiThe rahte haiñ vo Tas hote haiñ na mas hote haiñ

facebōk kūcha-e-jānāñ se hai miltī-jultī

har hasīna yahāñ mil jā.egī hiltī-jultī

ye mobile kisī āshiq ne banāyā hogā

us ko mahbūb ke abbā ne satāyā hogā

text jab āshiq-e-barqī kā aTak jaatā hai

tālib-e-shauq to suulī pe laTak jaatā hai

online tire āshiq kā yahī taur sahī

tū nahīñ aur sahī aur nahīñ aur sahī

net ijad hua hijr ke maron ke liye

search engine hai baDi chiz kunwaron ke liye

jis ko sadma shab-e-tanhai ke ayyam ka hai

aise aashiq ke liye net bahut kaam ka hai

net farhad ko shirin se mila deta hai

ishq insan ko goggle pe biTha deta hai

kaam maktub ka mouse se liya jata hai

aah-e-sozan ko bhi upload kiya jata hai

text mein log mohabbat ki KHata bhejte hain

ghar batate nahin office ka pata bhejte hain

aashiqon ka ye naya taur naya Type hai

pahle chilman hua karti thi ab skype hai

ishq kahte hain jise ek naya samjhauta hai

pahle dil milte the ab nam click hota hai

dil ka paigham jab email se mil jata hai

mel har chauk pe female se mil jata hai

ishq ka nam faqat aah-o-fughan tha pahle

Dak-KHane mein ye aaram kahan tha pahle

iD jab se mili hai mujhe ham-sai ki

achchhi lagti hai tawalat shab-e-tanhai ki

net pe log jo nawwe se palas hote hain

baiThe rahte hain wo Tas hote hain na mas hote hain

facebook kucha-e-jaanan se hai milti-julti

har hasina yahan mil jaegi hilti-julti

ye mobile kisi aashiq ne banaya hoga

us ko mahbub ke abba ne sataya hoga

text jab aashiq-e-barqi ka aTak jata hai

talib-e-shauq to suli pe laTak jata hai

online tere aashiq ka yahi taur sahi

tu nahin aur sahi aur nahin aur sahi