pap

burā na maano

namāzeñ ab bhī yahīñ paḌī haiñ

pe sajda-gāheñ uThā ke jaane kidhar chale the

vo sub.h tum ko bhī yaad hogī

alag the ghar aur alaihida chūlhe

tumhāre parcham kā rañg alag thā

vatan tumhārā nayā nayā thā

sabhī to bāñTā thā aadhā aadhā

magar paḌī haiñ vahāñ pe ab tak

hamārī rādhā kī ek paa.el

hamāre kirishnā kī ek bansī

pa 'hīr' kaise uThā ke de deñ

kahāñ se laa.eñ tumhārā rāñjhā

ki ham se pāgal

hisāb rakhte nahīñ dinoñ kā

hameñ to ye bhī pata nahīñ hai

ki āryā.ī se bābarī ham bane to kaise

hameñ to shañkh aur azaañ hai yaksāñ

hamārī tārīḳh ke kitne safhe

churā.e tum ne?

kahāñ kahāñ se nishāñ hamāre

miTā.e tum ne?

hamārī holī tumhāre bin hai udaas kitnī

tumheñ pata kyā

hamārī eidoñ ko tum se milne kī pyaas kitnī

kahāñ chale the uThā ke mimbar

kahāñ sajā.ī dukān tum ne

kahāñ pe beche haiñ maal kitne

kaho munāfā kamāyā kitnā

hamāre jaise

tumhāre jaise

ḳhudā ke bande

jo apne hisse kā paanī

khodeñ kuaañ to paa.eñ

jo apne tan ko dhuāñ banā.eñ to roTī khā.eñ

hameñ lakīroñ ke khel se kyā

hameñ tijārat se vāsta kab

jinheñ thā suud o ziyāñ se matlab

vo kārobār-e-jahāñ se ruḳhsat

pa aag ab bhī bhaḌak rahī hai

chalo buzurgoñ kā paap dho.eñ

hamāre mandir sambhālo tum sab

tumhārī masjid ke ham nigahbāñ

bura na mano

namazen ab bhi yahin paDi hain

pe sajda-gahen uTha ke jaane kidhar chale the

wo subh tum ko bhi yaad hogi

alag the ghar aur alaihida chulhe

tumhaare parcham ka rang alag tha

watan tumhaara naya naya tha

sabhi to banTa tha aadha aadha

magar paDi hain wahan pe ab tak

hamari radha ki ek pael

hamare kirishna ki ek bansi

pa 'hir' kaise uTha ke de den

kahan se laen tumhaara ranjha

ki hum se pagal

hisab rakhte nahin dinon ka

hamein to ye bhi pata nahin hai

ki aaryai se babari hum bane to kaise

hamein to shankh aur azan hai yaksan

hamari tariKH ke kitne safhe

churae tum ne?

kahan kahan se nishan hamare

miTae tum ne?

hamari holi tumhaare bin hai udas kitni

tumhein pata kya

hamari eidon ko tum se milne ki pyas kitni

kahan chale the uTha ke mimbar

kahan sajai dukan tum ne

kahan pe beche hain mal kitne

kaho munafa kamaya kitna

hamare jaise

tumhaare jaise

KHuda ke bande

jo apne hisse ka pani

khoden kuan to paen

jo apne tan ko dhuan banaen to roTi khaen

hamein lakiron ke khel se kya

hamein tijarat se wasta kab

jinhen tha sud o ziyan se matlab

wo karobar-e-jahan se ruKHsat

pa aag ab bhi bhaDak rahi hai

chalo buzurgon ka pap dhoen

hamare mandir sambhaalo tum sab

tumhaari masjid ke hum nigahban