pachasi sal niche gir gae

za.īfī kī shikan-ālūd chādar se badan Dhāñpe

vo apnī naujavāñ potī ke saath

āhista āhista

saḌak ke ek jānib chal rahā thā

gumāñ hotā thā

jaise dhuup ke kāñdhe pe

chhāñv haath rakkhe chal rahī hai

chīḳhtī eḌiyoñ par kaḌkaḌātī haDDiyāñ gaaḌe hue

vo jism kā malba uThā.e jā rahā thā

agarche paañv jumbish kar rahe the

magar būḌhī kamar itnī ḳhamīda thī

ki Tāñgeñ jhūltī baisākhiyāñ mālūm hotī thiiñ

achānak ek jiip aa kar rukī

laḌke ne shīshe ko utārā aur dekhā

phuul patlī shāḳh se laTkā huā thā

ḳhazāna ġhaar meñ thā

aur dahāne par faqat makḌī kā jaalā thā

hiran pinjre meñ thā

aur us ke darvāze par zañg-ālūd taalā thā

vo bhūke sher kī mānind lapkā

aur us laḌkī kī

niilī kāñch meñ lipTī kalā.ī par shikanja kas diyā

būḌhe ne kandhā chhoḌ kar apnī kamar par haath rakkhe

apnī āñkhoñ ko nazar dī

aur apne paañv par Tāñgeñ lagā liiñ

badan sāloñ kī dīmak kī

musalsal kār-farmā.ī se Dhal jaate haiñ

lekin ġhairateñ būḌhī nahīñ hotīñ

na jaane vo havā kā tez jhoñkā thā

yā būḌhe paañv ke halke tavāzun kī Dhilā.ī thī

phir laḌke ke hāthoñ kī darāzī thī

ki vo būḌhā

baḌī hī bebasī ke saath nīche gir gayā

aur us ke Dhalke jism ne

kaalī saḌak ke saath Takrāte hī ik āvāz dī

pachāsī saal nīche gir ga.e the

kabhī jab zalzala aa.e

to us kī jhurjhurī sī muḳhtalif umroñ ke ghar

girte haiñ aur āvāz dete haiñ

na.e cement meñ lipTī nam-imārat gir paḌe

to gaḌ-gaḌāhaT phail jaatī hai

palaza munhadim ho jaa.e to us ke dhamāke meñ

musalsal chaḌchaḌāhaT

saath detī hai

magar koī havelī gir paḌe

jis ke dar o dīvār par

kaa.ī añdherā gūñdh ke apnī harī poroñ se maltī hai

to us meñ sadiyāñ boltī haiñ

aur guzrī sā.atoñ kī kāñptī ḳhāmoshiyāñ āvāz detī haiñ

jab us ne haath se dhartī dabā ke

kohniyoñ kī āzmā.ish kī

ki shāyad is tarah vo uTh sake

to sirf apne sar ko gardan kā sahārā de sakā

bāloñ kī lambī ek laT

māthe pe mutavāzī khudī shiknoñ meñ

chhup kar kāñptī thī

aur kuchh bāloñ ko taaza choT rañgīñ kar ga.ī thī

tahayyur bebasī ke saath

āñkhoñ kī namī meñ jazb ho kar

āhanī chashme ke

shīshoñ meñ laraztā thā

khule hoñToñ meñ dāñtoñ ke shagāfoñ ko

zabāñ paivand kartī thī

dahan ke nam kināre

kaan ke bun

surḳh ruḳhsāroñ ke bal

chāh-e-zaqan ke muñh se laTke

tah-ba-tah gardan ke silvaT

aur un meñ Dolte paanī ke qatre

sab ke sab hilte the

bas raftār meñ ik dūsre se muḳhtalif the

havelī gir ga.ī thī

unnābī gard ne dīvār o dar gahnā diye the

fasīleñ surma.ī tālāb ke andar girī thiiñ

haram darvāza pā.īñ baaġh meñ auñdhā paḌā thā

aur us kī kiil meñ uljhā huā

bārīk parda hil rahā thā

zaifi ki shikan-alud chadar se badan Dhanpe

wo apni naujawan poti ke sath

aahista aahista

saDak ke ek jaanib chal raha tha

guman hota tha

jaise dhup ke kandhe pe

chhanw hath rakkhe chal rahi hai

chiKHti eDiyon par kaDkaDati haDDiyan gaDe hue

wo jism ka malba uThae ja raha tha

agarche panw jumbish kar rahe the

magar buDhi kamar itni KHamida thi

ki Tangen jhulti baisakhiyan malum hoti thin

achanak ek jip aa kar ruki

laDke ne shishe ko utara aur dekha

phul patli shaKH se laTka hua tha

KHazana ghaar mein tha

aur dahane par faqat makDi ka jala tha

hiran pinjre mein tha

aur us ke darwaze par zang-alud tala tha

wo bhuke sher ki manind lapka

aur us laDki ki

nili kanch mein lipTi kalai par shikanja kas diya

buDhe ne kandha chhoD kar apni kamar par hath rakkhe

apni aankhon ko nazar di

aur apne panw par Tangen laga lin

badan salon ki dimak ki

musalsal kar-farmai se Dhal jate hain

lekin ghairaten buDhi nahin hotin

na jaane wo hawa ka tez jhonka tha

ya buDhe panw ke halke tawazun ki Dhilai thi

phir laDke ke hathon ki daraazi thi

ki wo buDha

baDi hi bebasi ke sath niche gir gaya

aur us ke Dhalke jism ne

kali saDak ke sath Takraate hi ek aawaz di

pachasi sal niche gir gae the

kabhi jab zalzala aae

to us ki jhurjhuri si muKHtalif umron ke ghar

girte hain aur aawaz dete hain

nae cement mein lipTi nam-imarat gir paDe

to gaD-gaDahaT phail jati hai

palaza munhadim ho jae to us ke dhamake mein

musalsal chaDchaDahaT

sath deti hai

magar koi haweli gir paDe

jis ke dar o diwar par

kai andhera gundh ke apni hari poron se malti hai

to us mein sadiyan bolti hain

aur guzri saaton ki kanpti KHamoshiyan aawaz deti hain

jab us ne hath se dharti daba ke

kohniyon ki aazmaish ki

ki shayad is tarah wo uTh sake

to sirf apne sar ko gardan ka sahaara de saka

baalon ki lambi ek laT

mathe pe mutawazi khudi shiknon mein

chhup kar kanpti thi

aur kuchh baalon ko taza choT rangin kar gai thi

tahayyur bebasi ke sath

aankhon ki nami mein jazb ho kar

aahani chashme ke

shishon mein larazta tha

khule honTon mein danton ke shagafon ko

zaban paiwand karti thi

dahan ke nam kinare

kan ke bun

surKH ruKHsaron ke bal

chah-e-zaqan ke munh se laTke

tah-ba-tah gardan ke silwaT

aur un mein Dolte pani ke qatre

sab ke sab hilte the

bas raftar mein ek dusre se muKHtalif the

haweli gir gai thi

unnabi gard ne diwar o dar gahna diye the

fasilen surmai talab ke andar giri thin

haram darwaza pain bagh mein aundha paDa tha

aur us ki kil mein uljha hua

barik parda hil raha tha