pahla patthar

sabā hamāre rafīqoñ se jā ke ye kahnā

ba-sad tashakkur-o-iḳhlās-o-husn-o-ḳhush-adabī

ki jo sulūk bhī ham par ravā huā us meñ

na koī ramz nihāñ hai, na koī bulajabī

hamāre vāste ye raat bhī muqaddar thī

ki harf aa.e sitāroñ pe be-charāgī kā

libās-e-chāk pe tohmat qabā-e-zarrīñ kī

dil-e-shikasta pe ilzām bad-dimāġhī kā

sabā jo raah meñ dushman mileñ to farmānā

ki ye to kuchh na kiyā ho sake to aur kare

ki apne dast-e-lahū-rañg par nazar Daale

ki apne da.avā-e-ma.asūmiyat pe ġhaur kare

hadīs hai ki usūlan gunāhgār na hoñ

gunāhgār pe patthar sambhālne vaale

aur apnī aañkh ke shahtīr par nazar rakkheñ

hamārī aañkh se kāñTe nikālne vaale

saba hamare rafiqon se ja ke ye kahna

ba-sad tashakkur-o-iKHlas-o-husn-o-KHush-adabi

ki jo suluk bhi hum par rawa hua us mein

na koi ramz nihan hai, na koi bulajabi

hamare waste ye raat bhi muqaddar thi

ki harf aae sitaron pe be-charagi ka

libas-e-chaak pe tohmat qaba-e-zarrin ki

dil-e-shikasta pe ilzam bad-dimaghi ka

saba jo rah mein dushman milen to farmana

ki ye to kuchh na kiya ho sake to aur kare

ki apne dast-e-lahu-rang par nazar Dale

ki apne dawa-e-masumiyat pe ghaur kare

hadis hai ki usulan gunahgar na hon

gunahgar pe patthar sambhaalne wale

aur apni aankh ke shahtir par nazar rakkhen

hamari aankh se kanTe nikalne wale