pahli barf-bari

nīlgūñ abr chhaTā

surma.ī shaam ke sūraj kī tilā.ī kirneñ

marmarīñ barf ke billor badan par barseñ

jhūmte peḌoñ kī bāhoñ meñ mahakte jhoñke

peñg sī le ke parī-chehra muñDeroñ kī jabīñ par umDe

dhuñd kī malgajī āġhosh meñ ḳhvābīda makānoñ kī chhatoñ ne apnī

chhātiyāñ khol ke añgḌā.iyāñ liiñ

zalzala thā ki mirā vahm thā kuchh thā jis se

thartharā uTThe mire haath aur in ke nīche

jhanjhanā uTThī thī yuuñ balcony kī reling

jaise baj uTheñ kisī saaz ke taar

aur maiñ lauT ke kamre meñ chalā aayā thā

ahmarīñ shaal meñ lipTī huī ik laḌkī ne

chaa.e kī pyālī mire haath meñ dete hue haule se kahā thā ab to

is sukūñ-zār meñ koī bhī nahīñ apne sivā

tum jinheñ rog samajhte the vo sab log ga.e

avvalīñ barf ke paḌte hī mirī kā har ghar

be-sadā chhoḌ ga.e is ke makīñ

shor kā naam nahīñ

ab to yuuñ chup na raho

jī meñ aayā thā ki us se kah duuñ

sab kahāñ tum to abhī tak ho yahāñ par lekin

jaane kyā soch ke ḳhāmosh rahā

nilgun abr chhaTa

surmai sham ke suraj ki tilai kirnen

marmarin barf ke billor badan par barsen

jhumte peDon ki bahon mein mahakte jhonke

peng si le ke pari-chehra munDeron ki jabin par umDe

dhund ki malgaji aaghosh mein KHwabida makanon ki chhaton ne apni

chhatiyan khol ke angDaiyan lin

zalzala tha ki mera wahm tha kuchh tha jis se

tharthara uTThe mere hath aur in ke niche

jhanjhana uTThi thi yun balcony ki reling

jaise baj uThen kisi saz ke tar

aur main lauT ke kamre mein chala aaya tha

ahmarin shaal mein lipTi hui ek laDki ne

chae ki pyali mere hath mein dete hue haule se kaha tha ab to

is sukun-zar mein koi bhi nahin apne siwa

tum jinhen rog samajhte the wo sab log gae

awwalin barf ke paDte hi meri ka har ghar

be-sada chhoD gae is ke makin

shor ka nam nahin

ab to yun chup na raho

ji mein aaya tha ki us se kah dun

sab kahan tum to abhi tak ho yahan par lekin

jaane kya soch ke KHamosh raha