pahnai

chhe hazār barsoñ se ahl-e-dīn-o-dānish ne

baar baar koshish kī baar baar koshish kī

taaki sāmne vaalī us ḳhamosh khaa.ī par

koī pul banā sakte

koī pul banā sakte us ḳhamosh khaa.ī par

jis kī ek jānib ko roz-e-āfrīnash se

hairat aur dahshat meñ dam-ba-ḳhud haiñ istāda

kuchh shu.ūr ke Tiile

har anā ke Tiile se lā-anā kī ik Dhalvān

ik athāh sī Dhalvān be-panāh sī Dhalvān

ek dam khaḌī Dhalvān us ḳhalā meñ jhuktī hai

jis kī tah bhī hai ḳhālī

ik khulā dahāna sā jis kī tah bhī hai ḳhālī

be-muzāhamat vus.at be-vajūd maujūdī

ik rabūda ḳhuddārī ik ġhunūda bedārī

narm o guñg pahnā.ī

narm narm sannāTā guñg guñg pahnā.ī

narm o guñg pahnā.ī maañ hai un chaTānoñ kī

sar ba āsmāñ jin kī choTiyāñ chamaktī haiñ

chashmak-e-sharar ban kar

chashmak-e-sharar ban kar har faroġh-e-musta.ajal

is aziim vus.at ke ḳhvāb-nāk siine meñ

nuur kā jhamākā sā ho ke raakh bantā hai

raakh bantī hai patthar

vus.atoñ se jo ThiTkā bas vahī to patthar hai

saḳhtī-o-salābat kyā ḳhud meñ band ho jaanā

ye girah na khul jaa.e bas isī liye saḳhtī

narmiyoñ se Dartī hai

narmiyoñ se Dartī hai saḳhtiyoñ kī ye duniyā

vus.atoñ se Dartī hai tañgiyoñ kī ye duniyā

naddiyoñ se Dartī hai pattharoñ kī ye duniyā

dil se aql Dartī hai

narmiyoñ kī zad se hai saḳhtiyoñ meñ mahjūrī

khā.īyoñ kā ḳhamyāza choTiyoñ kī hai duurī

sarvaroñ meñ duurī hai ḳhud-saroñ meñ duurī hai

pattharoñ meñ duurī hai

is athāh khaa.ī se pattharoñ ko vahshat hai

be-ḳhudī kī vus.at se har ḳhudī pe dahshat hai

jab se ye chaTāneñ haiñ shor hai chaTānoñ meñ

khā.īyoñ pe pul bāñdho

khā.īyoñ pe pul bāñdho khā.īyoñ pe pul bāñdho

saḳhtiyoñ se saḳhtī tak narmiyoñ pe pul bāñdho

tañgiyoñ se tañgī tak vus.atoñ pe pul bāñdhūñ

bas ye sa.ī jaarī hai

chhe hazar barson se ahl-e-din-o-danish ne

bar bar koshish ki bar bar koshish ki

taki samne wali us KHamosh khai par

koi pul bana sakte

koi pul bana sakte us KHamosh khai par

jis ki ek jaanib ko roz-e-afrinash se

hairat aur dahshat mein dam-ba-KHud hain istada

kuchh shuur ke Tile

har ana ke Tile se la-ana ki ek Dhalwan

ek athah si Dhalwan be-panah si Dhalwan

ek dam khaDi Dhalwan us KHala mein jhukti hai

jis ki tah bhi hai KHali

ek khula dahana sa jis ki tah bhi hai KHali

be-muzahamat wusat be-wajud maujudi

ek rabuda KHuddari ek ghunuda bedari

narm o gung pahnai

narm narm sannaTa gung gung pahnai

narm o gung pahnai man hai un chaTanon ki

sar ba aasman jin ki choTiyan chamakti hain

chashmak-e-sharar ban kar

chashmak-e-sharar ban kar har farogh-e-mustajal

is azim wusat ke KHwab-nak sine mein

nur ka jhamaka sa ho ke rakh banta hai

rakh banti hai patthar

wusaton se jo ThiTka bas wahi to patthar hai

saKHti-o-salabat kya KHud mein band ho jaana

ye girah na khul jae bas isi liye saKHti

narmiyon se Darti hai

narmiyon se Darti hai saKHtiyon ki ye duniya

wusaton se Darti hai tangiyon ki ye duniya

naddiyon se Darti hai pattharon ki ye duniya

dil se aql Darti hai

narmiyon ki zad se hai saKHtiyon mein mahjuri

khaiyon ka KHamyaza choTiyon ki hai duri

sarwaron mein duri hai KHud-saron mein duri hai

pattharon mein duri hai

is athah khai se pattharon ko wahshat hai

be-KHudi ki wusat se har KHudi pe dahshat hai

jab se ye chaTanen hain shor hai chaTanon mein

khaiyon pe pul bandho

khaiyon pe pul bandho khaiyon pe pul bandho

saKHtiyon se saKHti tak narmiyon pe pul bandho

tangiyon se tangi tak wusaton pe pul bandhun

bas ye sai jari hai