paigham-e-id

sab kī ḳhushiyoñ kā nishāñ hai nām-e-'īd

pyaar kā paiġhām hai paiġhām-e-'īd

dil mohabbat ke nashe se chuur ho

nūr-e-haq se zindagī māmūr ho

zang ḳhud-ġharazī kā dil se duur ho

jashn-e-rāhat kā yaqīñ ho nām-e-'īd

'iid aa.e to har insāñ hañs paḌe

ranj kī barchhī na siine meñ gaḌe

aañkh patjhaḌ meñ bahāroñ se laḌe

sub.h kī tamhīd sī ho shām-e-'īd

jab suneñ āvāz-e-nāqūs-o-azāñ

ek ho mahsūs donoñ kī zabāñ

zamzam-o-gang-o-jaman hoñ ek jaañ

ektā apnī bane in'ām-e-'īd

haal kyā kahiye dil-e-bīmār kā

dil meñ jazba hī nahīñ īsār kā

dars de koī masīhā pyaar kā

pyaar ke sūraj se chamke nām-e-'īd

'iid kī ḳhushiyāñ ye lamhātī na hoñ

zaḳhm in ḳhushiyoñ ke bārātī na hoñ

'iid vo kyā jis meñ ḳhush sāthī na hoñ

sab ko yaksāñ hī mile in'ām-e-'īd

sab ki KHushiyon ka nishan hai nam-e-'id

pyar ka paigham hai paigham-e-'id

dil mohabbat ke nashe se chur ho

nur-e-haq se zindagi mamur ho

zang KHud-gharazi ka dil se dur ho

jashn-e-rahat ka yaqin ho nam-e-'id

'id aae to har insan hans paDe

ranj ki barchhi na sine mein gaDe

aankh patjhaD mein bahaaron se laDe

subh ki tamhid si ho sham-e-'id

jab sunen aawaz-e-naqus-o-azan

ek ho mahsus donon ki zaban

zamzam-o-gang-o-jaman hon ek jaan

ekta apni bane in'am-e-'id

haal kya kahiye dil-e-bimar ka

dil mein jazba hi nahin isar ka

dars de koi masiha pyar ka

pyar ke suraj se chamke nam-e-'id

'id ki KHushiyan ye lamhati na hon

zaKHm in KHushiyon ke baraati na hon

'id wo kya jis mein KHush sathi na hon

sab ko yaksan hi mile in'am-e-'id