pairahan-e-sharar

khaḌā hai kaun ye pairāhan-e-sharar pahne

badan hai chuur to māthe se ḳhuun jaarī hai

zamāna guzrā ki farhād o qais ḳhatm hue

ye kis pe ahl-e-jahāñ hukm-e-sañg-bārī hai

yahāñ to koī bhī shīrīñ adā-nigār nahīñ

yahāñ to koī bhī lailā badan-bahār nahīñ

ye kis ke naam pe zaḳhmoñ kī lāla-kārī hai

koī divāna hai letā hai sach kā naam ab tak

fareb-o-makr ko kartā nahīñ salām ab tak

hai baat saaf sazā is kī sañg-sārī hai

khaDa hai kaun ye pairahan-e-sharar pahne

badan hai chur to mathe se KHun jari hai

zamana guzra ki farhad o qais KHatm hue

ye kis pe ahl-e-jahan hukm-e-sang-bari hai

yahan to koi bhi shirin ada-nigar nahin

yahan to koi bhi laila badan-bahaar nahin

ye kis ke nam pe zaKHmon ki lala-kari hai

koi diwana hai leta hai sach ka nam ab tak

fareb-o-makr ko karta nahin salam ab tak

hai baat saf saza is ki sang-sari hai