paisa

naqsh yaañ jis ke miyāñ haath lagā paise kā

us ne tayyār har ik ThāTh kiyā paise kā

ghar bhī pākīza imārat se banā paise kā

khānā ārām se khāne ko milā paise kā

kapḌā tan kā bhī milā zeb-fazā paise kā

jab huā paise kā ai dosto aa kar sanjog

ishrateñ paas huiiñ duur hue man ke rog

khaa.e jab māl-pūe duudh dahī mohan-bhog

dil ko ānand hue bhaag ga.e rog aur dhog

aisī ḳhūbī hai jahāñ aanā huā paise kā

saath ik dost ke ik din jo maiñ gulshan meñ gayā

vaañ ke sarv-o-suman-o-lāla-o-gul ko dekhā

pūchhā us se ki ye hai baaġh batāo kis kā

us ne tab gul kī tarah hañs diyā aur mujh se kahā

mehrbāñ mujh se ye tum pūchhā ho kyā paise kā

ye to kyā aur jo haiñ is se baḌe bāġh-o-chaman

haiñ khile kiyāriyoñ meñ nargis-o-nasrīn-o-suman

hauz favvāre haiñ bañgloñ meñ bhī parde chalvan

jā-ba-jā qumrī-o-bulbul kī sadā shor-afgan

vaañ bhī dekhā to faqat gul hai khilā paise kā

vaañ koī aayā liye ek murassā piñjḌā

laal dastār-o-dupaTTā bhī harā jūñ-totā

is meñ ik baiThī vo mainā ki ho bulbul bhī fidā

maiñ ne pūchhā ye tumhārā hai rahā vo chupkā

niklī minqār se mainā ke sadā paise kā

vaañ se niklā to makāñ ik nazar aayā aisā

dar-o-dīvār se chamke thā paḌā āb-e-talā

siim chūne kī jagah us kī thā īñToñ meñ lagā

vāh-vā kar ke kahā maiñ ne ye hogā kis kā

aql ne jab mujhe chupke se kahā paise kā

rūThā āshiq se jo māshūq koī haT kā bharā

aur vo minnat se kisī taur nahīñ hai mantā

ḳhūbiyāñ paise kī ai yaaro kahūñ maiñ kyā kyā

dil agar sañg se bhī us kā ziyāda thā kaḌā

mom-sā ho gayā jab naam sunā paise kā

jis ghaḌī hotī hai ai dosto paise kī numūd

har tarah hotī hai ḳhush-vaqti-o-ḳhūbī bahbūd

ḳhush-dilī tāzgī aur ḳhurmī kartī hai durūd

jo ḳhushī chāhiye hotī hai vahīñ aa maujūd

dekhā yaaro to ye hai aish-o-mazā paise kā

paise vaale ne agar baiTh ke logoñ meñ kahā

jaisā chāhūñ to makāñ vaisā hī Dālūñ banvā

harf-e-takrār kisī kī jo zabāñ par aayā

us ne banvā ke diyā jaldī se vaisā hī dikhā

us kā ye kaam hai ai dosto yā paise kā

naach aur raag kī bhī ḳhūb-sī tayyārī hai

husn hai naaz hai ḳhūbī hai tarah-dārī hai

rabt hai pyaar hai aur dostī hai yaarī hai

ġhaur se dekhā to sab aish kī bisyārī hai

ruup jis vaqt huā jalva-numā paise kā

daam meñ daam ke yaaro jo mirā dil hai asiir

is liye hotī hai ye merī zabāñ se taqrīr

jī meñ ḳhush rahtā hai aur dil bhī bahut aish-pazīr

jis qadar ho sakā maiñ ne kiyā tahrīr 'nazīr'

vasf aage maiñ likhūñ tā-ba-kujā paise kā

naqsh yan jis ke miyan hath laga paise ka

us ne tayyar har ek ThaTh kiya paise ka

ghar bhi pakiza imarat se bana paise ka

khana aaram se khane ko mila paise ka

kapDa tan ka bhi mila zeb-faza paise ka

jab hua paise ka ai dosto aa kar sanjog

ishraten pas huin dur hue man ke rog

khae jab mal-pue dudh dahi mohan-bhog

dil ko aanand hue bhag gae rog aur dhog

aisi KHubi hai jahan aana hua paise ka

sath ek dost ke ek din jo main gulshan mein gaya

wan ke sarw-o-suman-o-lala-o-gul ko dekha

puchha us se ki ye hai bagh batao kis ka

us ne tab gul ki tarah hans diya aur mujh se kaha

mehrban mujh se ye tum puchha ho kya paise ka

ye to kya aur jo hain is se baDe bagh-o-chaman

hain khile kiyariyon mein nargis-o-nasrin-o-suman

hauz fawware hain banglon mein bhi parde chalwan

ja-ba-ja qumri-o-bulbul ki sada shor-afgan

wan bhi dekha to faqat gul hai khila paise ka

wan koi aaya liye ek murassa pinjDa

lal dastar-o-dupaTTa bhi hara jun-tota

is mein ek baiThi wo maina ki ho bulbul bhi fida

main ne puchha ye tumhaara hai raha wo chupka

nikli minqar se maina ke sada paise ka

wan se nikla to makan ek nazar aaya aisa

dar-o-diwar se chamke tha paDa aab-e-tala

sim chune ki jagah us ki tha inTon mein laga

wah-wa kar ke kaha main ne ye hoga kis ka

aql ne jab mujhe chupke se kaha paise ka

ruTha aashiq se jo mashuq koi haT ka bhara

aur wo minnat se kisi taur nahin hai manta

KHubiyan paise ki ai yaro kahun main kya kya

dil agar sang se bhi us ka ziyaada tha kaDa

mom-sa ho gaya jab nam suna paise ka

jis ghaDi hoti hai ai dosto paise ki numud

har tarah hoti hai KHush-waqti-o-KHubi bahbud

KHush-dili tazgi aur KHurmi karti hai durud

jo KHushi chahiye hoti hai wahin aa maujud

dekha yaro to ye hai aish-o-maza paise ka

paise wale ne agar baiTh ke logon mein kaha

jaisa chahun to makan waisa hi Dalun banwa

harf-e-takrar kisi ki jo zaban par aaya

us ne banwa ke diya jaldi se waisa hi dikha

us ka ye kaam hai ai dosto ya paise ka

nach aur rag ki bhi KHub-si tayyari hai

husn hai naz hai KHubi hai tarah-dari hai

rabt hai pyar hai aur dosti hai yari hai

ghaur se dekha to sab aish ki bisyari hai

rup jis waqt hua jalwa-numa paise ka

dam mein dam ke yaro jo mera dil hai asir

is liye hoti hai ye meri zaban se taqrir

ji mein KHush rahta hai aur dil bhi bahut aish-pazir

jis qadar ho saka main ne kiya tahrir 'nazir'

wasf aage main likhun ta-ba-kuja paise ka