pandrah august

mausam bahut hasīñ hai fazā ḳhush-gavār hai

har rang ko mizāj-e-chaman sāzgār hai

kaliyoñ pe hai shabāb guloñ par nikhār hai

ye pandrah august kā din yādgār hai

ye din hamāre vāste yaum-e-najāt hai

ab vāqa.ī hayāt hamārī hayāt hai

har ik meñ bhā.ī-chāra hai har ik meñ pyaar hai

ye pandrah august kā din yādgār hai

bād-e-nasīm amn kā paiġhām laa.ī hai

hāthoñ pe ektā ke bhare jaam laa.ī hai

āzādī-e-vatan kā diloñ meñ ḳhumār hai

ye pandrah august kā din yādgār hai

dekhī jo mulk-bhar meñ tirange kī raushnī

surḳhī chamak uThī hai shahīdoñ ke ḳhuun kī

jo phuul hai chaman kī adā par nisār hai

ye pandrah august kā din yādgār hai

āzād aaj ham haiñ ye har ik ko ho yaqīn

bhārat meñ zaat paat ke jhagḌe na hoñ kahīñ

us sā.at-e-hasīñ kā 'la.īq' intizār hai

ye pandrah august kā din yādgār hai

mausam bahut hasin hai faza KHush-gawar hai

har rang ko mizaj-e-chaman sazgar hai

kaliyon pe hai shabab gulon par nikhaar hai

ye pandrah august ka din yaadgar hai

ye din hamare waste yaum-e-najat hai

ab waqai hayat hamari hayat hai

har ek mein bhai-chaara hai har ek mein pyar hai

ye pandrah august ka din yaadgar hai

baad-e-nasim amn ka paigham lai hai

hathon pe ekta ke bhare jam lai hai

aazadi-e-watan ka dilon mein KHumar hai

ye pandrah august ka din yaadgar hai

dekhi jo mulk-bhar mein tirange ki raushni

surKHi chamak uThi hai shahidon ke KHun ki

jo phul hai chaman ki ada par nisar hai

ye pandrah august ka din yaadgar hai

aazad aaj hum hain ye har ek ko ho yaqin

bhaarat mein zat pat ke jhagDe na hon kahin

us saat-e-hasin ka 'laiq' intizar hai

ye pandrah august ka din yaadgar hai