parastar

vo jo kahlātā thā dīvāna tirā

vo jise hifz thā afsāna tirā

jis kī dīvāroñ pe āvezāñ thiiñ

tasvīreñ tirī

vo jo dohrātā thā

taqrīreñ tirī

vo jo ḳhush thā tirī ḳhushiyoñ se

tire ġham se udaas

duur rah ke jo samajhtā thā

vo hai tere paas

vo jise sajda tujhe karne se

inkār na thā

us ko dar-asl kabhī tujh se

koī pyaar na thā

us kī mushkil thī

ki dushvār the us ke raste

jin pe be-ḳhauf-o-ḳhatar

ghūmte rahzan the

sadā us kī anā ke dar pe

us ne ghabrā ke

sab apnī anā kī daulat

terī tahvīl meñ rakhvā dī thī

apnī zillat ko vo duniyā kī nazar

aur apnī bhī nigāhoñ se chhupāne ke liye

kāmyābī ko tirī

tirī futūhāt

tirī izzat ko

vo tire naam tirī shohrat ko

apne hone kā sabab jāntā thā

hai vajūd us kā judā tujh se

ye kab māntā thā

vo magar

pur-ḳhatar rāstoñ se aaj nikal aayā hai

vaqt ne tere barābar na sahī

kuchh na kuchh apnā karam us pe bhī farmāyā hai

ab use terī zarūrat hī nahīñ

jis kā da.avā thā kabhī

ab vo aqīdat hī nahīñ

terī tahvīl meñ jo rakkhī thī kal

us ne anā

aaj vo maañg rahā hai vāpas

baat itnī sī hai

ai sāhib-e-nām-o-shohrat

jis ko kal

tere ḳhudā hone se inkār na thā

vo kabhī terā parastār na thā

wo jo kahlata tha diwana tera

wo jise hifz tha afsana tera

jis ki diwaron pe aawezan thin

taswiren teri

wo jo dohraata tha

taqriren teri

wo jo KHush tha teri KHushiyon se

tere gham se udas

dur rah ke jo samajhta tha

wo hai tere pas

wo jise sajda tujhe karne se

inkar na tha

us ko dar-asl kabhi tujh se

koi pyar na tha

us ki mushkil thi

ki dushwar the us ke raste

jin pe be-KHauf-o-KHatar

ghumte rahzan the

sada us ki ana ke dar pe

us ne ghabra ke

sab apni ana ki daulat

teri tahwil mein rakhwa di thi

apni zillat ko wo duniya ki nazar

aur apni bhi nigahon se chhupane ke liye

kaamyabi ko teri

teri futuhat

teri izzat ko

wo tere nam teri shohrat ko

apne hone ka sabab jaanta tha

hai wajud us ka juda tujh se

ye kab manta tha

wo magar

pur-KHatar raston se aaj nikal aaya hai

waqt ne tere barabar na sahi

kuchh na kuchh apna karam us pe bhi farmaya hai

ab use teri zarurat hi nahin

jis ka dawa tha kabhi

ab wo aqidat hi nahin

teri tahwil mein jo rakkhi thi kal

us ne ana

aaj wo mang raha hai wapas

baat itni si hai

ai sahib-e-nam-o-shohrat

jis ko kal

tere KHuda hone se inkar na tha

wo kabhi tera parastar na tha