parchhaiyan

javān raat ke siine pe dūdhiyā āñchal

machal rahā hai kisī ḳhvāb-e-marmarīñ kī tarah

hasīn phuul hasīñ patiyāñ hasīñ shāḳheñ

lachak rahī haiñ kisī jism-e-nāznīñ kī tarah

fazā meñ ghul se ga.e haiñ ufuq ke narm ḳhutūt

zamīñ hasīn hai ḳhvāboñ kī sarzamīñ kī tarah

tasavvurāt kī parchhā.iyāñ ubhartī haiñ

kabhī gumān kī sūrat kabhī yaqīñ kī tarah

vo peḌ jin ke tale ham panāh lete the

khaḌe haiñ aaj bhī sākit kisī amiiñ kī tarah

unhī ke saa.e meñ phir aaj do dhaḌakte dil

ḳhamosh hoñToñ se kuchh kahne sunñe aa.e haiñ

na jaane kitnī kashākash se kitnī kāvish se

ye sote jāgte lamhe churā ke laa.e haiñ

yahī fazā thī yahī rut yahī zamāna thā

yahīñ se ham ne mohabbat kī ibtidā kī thī

dhaḌakte dil se laraztī huī nigāhoñ se

huzūr-e-ġhaib meñ nannhī sī iltijā kī thī

ki aarzū ke kañval khil ke phuul ho jaa.eñ

dil-o-nazar kī duā.eñ qubūl ho jaa.eñ

tasavvurāt kī parchhā.iyāñ ubhartī haiñ

tum aa rahī ho zamāne kī aañkh se bach kar

nazar jhukā.e hue aur badan churā.e hue

ḳhud apne qadmoñ kī aahaT se jheñptī Dartī

ḳhud apne saa.e kī jumbish se ḳhauf khaa.e hue

tasavvurāt kī parchhā.iyāñ ubhartī haiñ

ravāñ hai chhoTī sī kashtī havāoñ ke ruḳh par

nadī ke saaz pe mallāh giit gaatā hai

tumhārā jism har ik lahr ke jhakole se

mirī khulī huī bāhoñ meñ jhuul jaatā hai

tasavvurāt kī parchhā.iyāñ ubhartī haiñ

maiñ phuul Taañk rahā huuñ tumhāre joḌe meñ

tumhārī aañkh masarrat se jhuktī jaatī hai

na jaane aaj maiñ kyā baat kahne vaalā huuñ

zabān ḳhushk hai āvāz ruktī jaatī hai

tasavvurāt kī parchhā.iyāñ ubhartī haiñ

mire gale meñ tumhārī gudāz bāheñ haiñ

tumhāre hoñToñ pe mere laboñ ke saa.e haiñ

mujhe yaqīñ hai ki ham ab kabhī na bichhḌeñge

tumheñ gumān ki ham mil ke bhī parā.e haiñ

tasavvurāt kī parchhā.iyāñ ubhartī haiñ

mire palang pe bikhrī huī kitāboñ ko

adā-e-ijz-o-karam se uThā rahī ho tum

suhāg-rāt jo Dholak pe gaa.e jaate haiñ

dabe suroñ meñ vahī giit gā rahī ho tum

tasavvurāt kī parchhā.iyāñ ubhartī haiñ

vo lamhe kitne dilkash the vo ghaḌiyāñ kitnī pyārī thiiñ

vo sehre kitne nāzuk the vo laḌiyāñ kitnī pyārī thiiñ

bastī kī har ik shādāb galī ḳhvāboñ kā jazīra thī goyā

har mauj-e-nafas har mauj-e-sabā naġhmoñ kā zaḳhīra thī goyā

nāgāh lahakte khetoñ se Tāpoñ kī sadā.eñ aane lagīñ

bārūd kī bojhal bū le kar pachchhim se havā.eñ aane lagīñ

ta.amīr ke raushan chehre par taḳhrīb kā bādal phail gayā

har gaañv meñ vahshat naach uThī har shahr meñ jangal phail gayā

maġhrib ke mohazzab mulkoñ se kuchh ḳhākī-vardī-posh aa.e

iThlāte hue maġhrūr aa.e lahrāte hue mad.hosh aa.e

ḳhāmosh zamīñ ke siine meñ ḳhemoñ kī tanābeñ gaḌne lagīñ

makkhan sī mulā.em rāhoñ par būToñ kī ḳharāsheñ paḌne lagīñ

faujoñ ke bhayānak band tale charḳhoñ kī sadā.eñ Duub ga.iiñ

jīpoñ kī sulagtī dhuul tale phūloñ kī qabā.eñ Duub ga.iiñ

insān kī qismat girne lagī ajnās ke bhaav chaḌhne lage

chaupāl kī raunaq ghuTne lagī bhartī ke dafātir baḌhne lage

bastī ke sajīle shoḳh javāñ ban ban ke sipāhī jaane lage

jis raah se kam hī lauT sake us raah pe raahī jaane lage

un jaane vaale dastoñ meñ ġhairat bhī ga.ī barnā.ī bhī

maaoñ ke javāñ beTe bhī ga.e bahnoñ ke chahete bhaa.ī bhī

bastī pe udāsī chhāne lagī meloñ kī bahāreñ ḳhatm huiiñ

aamoñ kī lachaktī shāḳhoñ se jhūloñ kī qatāreñ ḳhatm huiiñ

dhuul uḌne lagī bāzāroñ meñ bhuuk ugne lagī khaliyānoñ meñ

har chiiz dukānoñ se uTh kar rū-posh huī tah-ḳhānoñ meñ

bad-hāl gharoñ kī bad-halī baḌhte baḌhte janjāl banī

mahñgā.ī baḌh kar kaal banī saarī bastī kañgāl banī

charvāhiyāñ rasta bhuul ga.iiñ panhāriyāñ panghaT chhoḌ ga.iiñ

kitnī hī kuñvārī ablā.eñ maañ baap kī chaukhaT chhoḌ ga.iiñ

aflās-zada dahqānoñ ke hal bail bike khaliyān bike

jiine kī tamannā ke hāthoñ jiine ke sab sāmān bike

kuchh bhī na rahā jab bikne ko jismoñ kī tijārat hone lagī

ḳhalvat meñ bhī jo mamnūa thī vo jalvat meñ jasārat hone lagī

tasavvurāt kī parchhā.iyāñ ubhartī haiñ

tum aa rahī ho sar-e-shām baal bikhrā.e

hazār-gūna malāmat kā baar uThā.e hue

havas-parast nigāhoñ kī chīra-dastī se

badan kī jheñptī uryāniyāñ chhupā.e hue

tasavvurāt kī parchhā.iyāñ ubhartī haiñ

maiñ shahr jā ke har ik dar pe jhāñk aayā huuñ

kisī jagah mirī mehnat kā mol mil na sakā

sitamgaroñ ke siyāsī qimār-ḳhāne meñ

alam-nasīb farāsat kā mol mil na sakā

tasavvurāt kī parchhā.iyāñ ubhartī haiñ

tumhāre ghar meñ qayāmat kā shor barpā hai

mahāz-e-jang se harkāra taar laayā hai

ki jis kā zikr tumheñ zindagī se pyārā thā

vo bhaa.ī narġha-e-dushman meñ kaam aayā hai

tasavvurāt kī parchhā.iyāñ ubhartī haiñ

har ek gaam pe bad-nāmiyoñ kā jamghaT hai

har ek moḌ pe rusvā.iyoñ ke mele haiñ

na dostī na takalluf na dilbarī na ḳhulūs

kisī kā koī nahīñ aaj sab akele haiñ

tasavvurāt kī parchhā.iyāñ ubhartī haiñ

vo rahguzar jo mire dil kī tarah suunī hai

na jaane tum ko kahāñ le ke jaane vaalī hai

tumheñ ḳharīd rahe haiñ zamīr ke qātil

ufuq pe ḳhūn-e-tamannā-e-dil kī laalī hai

tasavvurāt kī parchhā.iyāñ ubhartī haiñ

sūraj ke lahū meñ lithḌī huī vo shaam hai ab tak yaad mujhe

chāhat ke sunahre ḳhvāboñ kā anjām hai ab tak yaad mujhe

us shaam mujhe mālūm huā khetoñ kī tarah is duniyā meñ

sahmī huī do-shīzāoñ kī muskān bhī bechī jaatī hai

us shaam mujhe mālūm huā is kār-gah-e-zardārī meñ

do bholī-bhālī rūhoñ kī pahchān bhī bechī jaatī hai

us shaam mujhe mālūm huā jab baap kī khetī chhin jaa.e

mamtā ke sunahre ḳhvāboñ kī anmol nishānī biktī hai

us shaam mujhe mālūm huā jab bhaa.ī jang meñ kaam aa.eñ

sarmā.e ke qahba-ḳhāne meñ bahnoñ kī javānī biktī hai

sūraj ke lahū meñ lithḌī huī vo shaam hai ab tak yaad mujhe

chāhat ke sunahre ḳhvāboñ kā anjām hai ab tak yaad mujhe

tum aaj hazāroñ miil yahāñ se duur kahīñ tanhā.ī meñ

yā bazm-e-tarab-ārā.ī meñ

mere sapne buntī hoñgī baiThī āġhosh parā.ī meñ

aur maiñ siine meñ ġham le kar din-rāt mashaqqat kartā huuñ

jiine kī ḳhātir martā huuñ

apne fan ko rusvā kar ke aġhyār kā dāman bhartā huuñ

majbūr huuñ maiñ majbūr ho tum majbūr ye duniyā saarī hai

tan kā dukh man par bhārī hai

is daur meñ jiine kī qīmat yā dār-o-rasan yā ḳhvārī hai

maiñ dār-o-rasan tak jā na sakā tum jehd kī had tak aa na sakīñ

chāhā to magar apnā na sakīñ

ham to do aisī rūheñ haiñ jo manzil-e-taskīñ pā na sakeñ

jiine ko jiye jaate haiñ magar sāñsoñ meñ chitāeñ jaltī haiñ

ḳhāmosh vafā.eñ jaltī haiñ

sangīn haqā.iq-zāroñ meñ ḳhvāboñ kī ridā.eñ jaltī haiñ

aur aaj jab in peḌoñ ke tale phir do saa.e lahrā.e haiñ

phir do dil milne aa.e haiñ

phir maut kī āñdhī uTThī hai phir jañg ke bādal chhā.e haiñ

maiñ soch rahā huuñ in kā bhī apnī hī tarah anjām na ho

in kā bhī junūñ nākām na ho

in ke bhī muqaddar meñ likhī ik ḳhuun meñ lithḌī shaam na ho

sūraj ke lahū meñ lithḌī huī vo shaam hai ab tak yaad mujhe

chāhat ke sunahre ḳhvāboñ kā anjām hai ab tak yaad mujhe

hamārā pyaar havādis kī taab lā na sakā

magar unheñ to murādoñ kī raat mil jaa.e

hameñ to kashmakash-e-marg-e-be-amāñ hī milī

unheñ to jhūmtī gaatī hayāt mil jaa.e

bahut dinoñ se hai ye mashġhala siyāsat kā

ki jab javān hoñ bachche to qatl ho jaa.eñ

bahut dinoñ se ye hai ḳhabt hukmarānoñ kā

ki duur duur ke mulkoñ meñ qaht bo jaa.eñ

bahut dinoñ se javānī ke ḳhvāb vīrāñ haiñ

bahut dinoñ se sitam-dīda shāh-rāhoñ meñ

nigār-e-zīst kī ismat panāh DhūñDhtī hai

chalo ki aaj sabhī pā.emāl rūhoñ se

kaheñ ki apne har ik zaḳhm ko zabāñ kar leñ

hamārā raaz hamārā nahīñ sabhī kā hai

chalo ki saare zamāne ko rāz-dāñ kar leñ

chalo ki chal ke siyāsī muqāmiroñ se kaheñ

ki ham ko jang-o-jadal ke chalan se nafrat hai

jise lahū ke sivā koī rang raas na aa.e

hameñ hayāt ke us pairahan se nafrat hai

kaho ki ab koī qātil agar idhar aayā

to har qadam pe zamīñ tang hotī jā.egī

har ek mauj-e-havā ruḳh badal ke jhapTegī

har ek shāḳh rag-e-sañg hotī jā.egī

uTho ki aaj har ik jang-jū se ye kah deñ

ki ham ko kaam kī ḳhātir kaloñ kī hājat hai

hameñ kisī kī zamīñ chhīnñe kā shauq nahīñ

hameñ to apnī zamīñ par haloñ kī hājat hai

kaho ki ab koī tājir idhar kā ruḳh na kare

ab is jagah koī kuñvārī na bechī jā.egī

ye khet jaag paḌe uTh khaḌī huiiñ fasleñ

ab is jagah koī kyārī na bechī jā.egī

ye sar-zamīn hai gautam kī aur nānak kī

is arz-e-pāk pe vahshī na chal sakeñge kabhī

hamārā ḳhuun amānat hai nasl-e-nau ke liye

hamāre ḳhuun pe lashkar na pal sakeñge kabhī

kaho ki aaj bhī ham sab agar ḳhamosh rahe

to is damakte hue ḳhāk-dāñ kī ḳhair nahīñ

junūñ kī Dhālī huī atomī balāoñ se

zamīñ kī ḳhair nahīñ āsmāñ kī ḳhair nahīñ

guzishta jang meñ ghar hī jale magar is baar

ajab nahīñ ki ye tanhā.iyāñ bhī jal jaa.eñ

guzishta jañg meñ paikar jale magar is baar

ajab nahīñ ki ye parchhā.iyāñ bhī jal jaa.eñ

tasavvurāt kī parchhā.iyāñ ubhartī haiñ

jawan raat ke sine pe dudhiya aanchal

machal raha hai kisi KHwab-e-marmarin ki tarah

hasin phul hasin patiyan hasin shaKHen

lachak rahi hain kisi jism-e-naznin ki tarah

faza mein ghul se gae hain ufuq ke narm KHutut

zamin hasin hai KHwabon ki sarzamin ki tarah

tasawwuraat ki parchhaiyan ubharti hain

kabhi guman ki surat kabhi yaqin ki tarah

wo peD jin ke tale hum panah lete the

khaDe hain aaj bhi sakit kisi amin ki tarah

unhi ke sae mein phir aaj do dhaDakte dil

KHamosh honTon se kuchh kahne sunne aae hain

na jaane kitni kashakash se kitni kawish se

ye sote jagte lamhe chura ke lae hain

yahi faza thi yahi rut yahi zamana tha

yahin se hum ne mohabbat ki ibtida ki thi

dhaDakte dil se larazti hui nigahon se

huzur-e-ghaib mein nannhi si iltija ki thi

ki aarzu ke kanwal khil ke phul ho jaen

dil-o-nazar ki duaen qubul ho jaen

tasawwuraat ki parchhaiyan ubharti hain

tum aa rahi ho zamane ki aankh se bach kar

nazar jhukae hue aur badan churae hue

KHud apne qadmon ki aahaT se jhenpti Darti

KHud apne sae ki jumbish se KHauf khae hue

tasawwuraat ki parchhaiyan ubharti hain

rawan hai chhoTi si kashti hawaon ke ruKH par

nadi ke saz pe mallah git gata hai

tumhaara jism har ek lahr ke jhakole se

meri khuli hui bahon mein jhul jata hai

tasawwuraat ki parchhaiyan ubharti hain

main phul Tank raha hun tumhaare joDe mein

tumhaari aankh masarrat se jhukti jati hai

na jaane aaj main kya baat kahne wala hun

zaban KHushk hai aawaz rukti jati hai

tasawwuraat ki parchhaiyan ubharti hain

mere gale mein tumhaari gudaz bahen hain

tumhaare honTon pe mere labon ke sae hain

mujhe yaqin hai ki hum ab kabhi na bichhDenge

tumhein guman ki hum mil ke bhi parae hain

tasawwuraat ki parchhaiyan ubharti hain

mere palang pe bikhri hui kitabon ko

ada-e-ijz-o-karam se uTha rahi ho tum

suhag-raat jo Dholak pe gae jate hain

dabe suron mein wahi git ga rahi ho tum

tasawwuraat ki parchhaiyan ubharti hain

wo lamhe kitne dilkash the wo ghaDiyan kitni pyari thin

wo sehre kitne nazuk the wo laDiyan kitni pyari thin

basti ki har ek shadab gali KHwabon ka jazira thi goya

har mauj-e-nafas har mauj-e-saba naghmon ka zaKHira thi goya

nagah lahakte kheton se Tapon ki sadaen aane lagin

barud ki bojhal bu le kar pachchhim se hawaen aane lagin

tamir ke raushan chehre par taKHrib ka baadal phail gaya

har ganw mein wahshat nach uThi har shahr mein jangal phail gaya

maghrib ke mohazzab mulkon se kuchh KHaki-wardi-posh aae

iThlate hue maghrur aae lahraate hue madhosh aae

KHamosh zamin ke sine mein KHemon ki tanaben gaDne lagin

makkhan si mulaem rahon par buTon ki KHarashen paDne lagin

faujon ke bhayanak band tale charKHon ki sadaen Dub gain

jipon ki sulagti dhul tale phulon ki qabaen Dub gain

insan ki qismat girne lagi ajnas ke bhaw chaDhne lage

chaupal ki raunaq ghuTne lagi bharti ke dafatir baDhne lage

basti ke sajile shoKH jawan ban ban ke sipahi jaane lage

jis rah se kam hi lauT sake us rah pe rahi jaane lage

un jaane wale daston mein ghairat bhi gai barnai bhi

maon ke jawan beTe bhi gae bahnon ke chahete bhai bhi

basti pe udasi chhane lagi melon ki bahaaren KHatm huin

aamon ki lachakti shaKHon se jhulon ki qataren KHatm huin

dhul uDne lagi bazaron mein bhuk ugne lagi khaliyanon mein

har chiz dukanon se uTh kar ru-posh hui tah-KHanon mein

bad-haal gharon ki bad-hali baDhte baDhte janjal bani

mahngai baDh kar kal bani sari basti kangal bani

charwahiyan rasta bhul gain panhaariyan panghaT chhoD gain

kitni hi kunwari ablaen man bap ki chaukhaT chhoD gain

aflas-zada dahqanon ke hal bail bike khaliyan bike

jine ki tamanna ke hathon jine ke sab saman bike

kuchh bhi na raha jab bikne ko jismon ki tijarat hone lagi

KHalwat mein bhi jo mamnua thi wo jalwat mein jasarat hone lagi

tasawwuraat ki parchhaiyan ubharti hain

tum aa rahi ho sar-e-sham baal bikhrae

hazar-guna malamat ka bar uThae hue

hawas-parast nigahon ki chira-dasti se

badan ki jhenpti uryaniyan chhupae hue

tasawwuraat ki parchhaiyan ubharti hain

main shahr ja ke har ek dar pe jhank aaya hun

kisi jagah meri mehnat ka mol mil na saka

sitamgaron ke siyasi qimar-KHane mein

alam-nasib farasat ka mol mil na saka

tasawwuraat ki parchhaiyan ubharti hain

tumhaare ghar mein qayamat ka shor barpa hai

mahaz-e-jang se harkara tar laya hai

ki jis ka zikr tumhein zindagi se pyara tha

wo bhai nargha-e-dushman mein kaam aaya hai

tasawwuraat ki parchhaiyan ubharti hain

har ek gam pe bad-namiyon ka jamghaT hai

har ek moD pe ruswaiyon ke mele hain

na dosti na takalluf na dilbari na KHulus

kisi ka koi nahin aaj sab akele hain

tasawwuraat ki parchhaiyan ubharti hain

wo rahguzar jo mere dil ki tarah suni hai

na jaane tum ko kahan le ke jaane wali hai

tumhein KHarid rahe hain zamir ke qatil

ufuq pe KHun-e-tamanna-e-dil ki lali hai

tasawwuraat ki parchhaiyan ubharti hain

suraj ke lahu mein lithDi hui wo sham hai ab tak yaad mujhe

chahat ke sunahre KHwabon ka anjam hai ab tak yaad mujhe

us sham mujhe malum hua kheton ki tarah is duniya mein

sahmi hui do-shizaon ki muskan bhi bechi jati hai

us sham mujhe malum hua is kar-gah-e-zardari mein

do bholi-bhaali ruhon ki pahchan bhi bechi jati hai

us sham mujhe malum hua jab bap ki kheti chhin jae

mamta ke sunahre KHwabon ki anmol nishani bikti hai

us sham mujhe malum hua jab bhai jang mein kaam aaen

sarmae ke qahba-KHane mein bahnon ki jawani bikti hai

suraj ke lahu mein lithDi hui wo sham hai ab tak yaad mujhe

chahat ke sunahre KHwabon ka anjam hai ab tak yaad mujhe

tum aaj hazaron mil yahan se dur kahin tanhai mein

ya bazm-e-tarab-arai mein

mere sapne bunti hongi baiThi aaghosh parai mein

aur main sine mein gham le kar din-raat mashaqqat karta hun

jine ki KHatir marta hun

apne fan ko ruswa kar ke aghyar ka daman bharta hun

majbur hun main majbur ho tum majbur ye duniya sari hai

tan ka dukh man par bhaari hai

is daur mein jine ki qimat ya dar-o-rasan ya KHwari hai

main dar-o-rasan tak ja na saka tum jehd ki had tak aa na sakin

chaha to magar apna na sakin

hum to do aisi ruhen hain jo manzil-e-taskin pa na saken

jine ko jiye jate hain magar sanson mein chitaen jalti hain

KHamosh wafaen jalti hain

sangin haqaiq-zaron mein KHwabon ki ridaen jalti hain

aur aaj jab in peDon ke tale phir do sae lahrae hain

phir do dil milne aae hain

phir maut ki aandhi uTThi hai phir jang ke baadal chhae hain

main soch raha hun in ka bhi apni hi tarah anjam na ho

in ka bhi junun nakaam na ho

in ke bhi muqaddar mein likhi ek KHun mein lithDi sham na ho

suraj ke lahu mein lithDi hui wo sham hai ab tak yaad mujhe

chahat ke sunahre KHwabon ka anjam hai ab tak yaad mujhe

hamara pyar hawadis ki tab la na saka

magar unhen to muradon ki raat mil jae

hamein to kashmakash-e-marg-e-be-aman hi mili

unhen to jhumti gati hayat mil jae

bahut dinon se hai ye mashghala siyasat ka

ki jab jawan hon bachche to qatl ho jaen

bahut dinon se ye hai KHabt hukmaranon ka

ki dur dur ke mulkon mein qaht bo jaen

bahut dinon se jawani ke KHwab viran hain

bahut dinon se sitam-dida shah-rahon mein

nigar-e-zist ki ismat panah DhunDhti hai

chalo ki aaj sabhi paemal ruhon se

kahen ki apne har ek zaKHm ko zaban kar len

hamara raaz hamara nahin sabhi ka hai

chalo ki sare zamane ko raaz-dan kar len

chalo ki chal ke siyasi muqamiron se kahen

ki hum ko jang-o-jadal ke chalan se nafrat hai

jise lahu ke siwa koi rang ras na aae

hamein hayat ke us pairahan se nafrat hai

kaho ki ab koi qatil agar idhar aaya

to har qadam pe zamin tang hoti jaegi

har ek mauj-e-hawa ruKH badal ke jhapTegi

har ek shaKH rag-e-sang hoti jaegi

uTho ki aaj har ek jang-ju se ye kah den

ki hum ko kaam ki KHatir kalon ki hajat hai

hamein kisi ki zamin chhinne ka shauq nahin

hamein to apni zamin par halon ki hajat hai

kaho ki ab koi tajir idhar ka ruKH na kare

ab is jagah koi kunwari na bechi jaegi

ye khet jag paDe uTh khaDi huin faslen

ab is jagah koi kyari na bechi jaegi

ye sar-zamin hai gautam ki aur nanak ki

is arz-e-pak pe wahshi na chal sakenge kabhi

hamara KHun amanat hai nasl-e-nau ke liye

hamare KHun pe lashkar na pal sakenge kabhi

kaho ki aaj bhi hum sab agar KHamosh rahe

to is damakte hue KHak-dan ki KHair nahin

junun ki Dhaali hui atomi balaon se

zamin ki KHair nahin aasman ki KHair nahin

guzishta jang mein ghar hi jale magar is bar

ajab nahin ki ye tanhaiyan bhi jal jaen

guzishta jang mein paikar jale magar is bar

ajab nahin ki ye parchhaiyan bhi jal jaen

tasawwuraat ki parchhaiyan ubharti hain