parchhaiyan

kaash ik shab koī chāñd aisā uge

ādatan tū mujhe yuuñ to jis meñ dikhe

haañ agar aks ho vo tirā āḳhrī

dard kā ho ye manzar mirā āḳhrī

us sahar meñ khule aañkh merī kī jab

yuuñ lage jaise tū hai nahīñ thā nahīñ

vo jo lamhe guzar kar gayā thā kabhī

yuuñ lage vo kabhī jaise guzrā nahīñ

par ḳhayālāt to ''phir ḳhayālāt haiñ

kuchh nahīñ dil se umda ye jazbāt haiñ

phir ye mumkin kahāñ gar koī ho milā

saath sāñseñ bharī saath royā hañsā

vo jo hissa ho ik zindagī kā mirī

ho sabab ġham kā yā ho ḳhushī kā mirī

jo huā hai vo kaise huā hī nahīñ

kaise sochūñ vo dil meñ rahā hī nahīñ

vo to thā ab bhī hai aur rahegā sadā

vo gayā thā hī kab jo ki aa.e bhalā

apne maazī meñ jhāñkūñ na pā.ūñ tujhe

ab ye mumkin kahāñ bhuul jā.ūñ tujhe

ek pal thā abhī tū yahīñ thā yahīñ

aur pal ye hai ik tū kahīñ bhī nahīñ

gar nahīñ tū to yādeñ tirī kyuuñ raheñ

zehn-o-dil par ye bāteñ tirī kyuuñ raheñ

kiyā kabhī zindagī aisā hogā nahīñ

vo jo ab hai nahīñ maan luuñ thā nahīñ

aisā hogā kabhī ho tasallī kabhī

yahī honā thā likkhā huā bhī yahī

jis tarah ek pal meñ judā vo huā

maiñ bhī kah duuñ ki ab jo huā so huā

par yahī ik hunar mujh ko aayā nahīñ

yaad kar ke ye dil bhuul paayā nahīñ

laḳht-e-dil kī tarah mujh meñ rahtā hai vo

qatra-e-ḳhūn sā mujh meñ bahtā hai vo

vo koī shai kahāñ maiñ jase chhoḌ duuñ

rābta vo kahāñ maiñ jise toḌ duuñ

mashq hai rañg hai lutf hai ḳhaas hai

yaad hai yaad to ek ehsās hai

yaad maiñ ab kahāñ chhoḌ aa.uuñ tujhe

ab ye mumkin kahāñ bhuul jā.ūñ tujhe

kash ek shab koi chand aisa uge

aadatan tu mujhe yun to jis mein dikhe

han agar aks ho wo tera aaKHri

dard ka ho ye manzar mera aaKHri

us sahar mein khule aankh meri ki jab

yun lage jaise tu hai nahin tha nahin

wo jo lamhe guzar kar gaya tha kabhi

yun lage wo kabhi jaise guzra nahin

par KHayalat to phir KHayalat hain

kuchh nahin dil se umda ye jazbaat hain

phir ye mumkin kahan gar koi ho mila

sath sansen bhari sath roya hansa

wo jo hissa ho ek zindagi ka meri

ho sabab gham ka ya ho KHushi ka meri

jo hua hai wo kaise hua hi nahin

kaise sochun wo dil mein raha hi nahin

wo to tha ab bhi hai aur rahega sada

wo gaya tha hi kab jo ki aae bhala

apne mazi mein jhankun na paun tujhe

ab ye mumkin kahan bhul jaun tujhe

ek pal tha abhi tu yahin tha yahin

aur pal ye hai ek tu kahin bhi nahin

gar nahin tu to yaaden teri kyun rahen

zehn-o-dil par ye baaten teri kyun rahen

kiya kabhi zindagi aisa hoga nahin

wo jo ab hai nahin man lun tha nahin

aisa hoga kabhi ho tasalli kabhi

yahi hona tha likkha hua bhi yahi

jis tarah ek pal mein juda wo hua

main bhi kah dun ki ab jo hua so hua

par yahi ek hunar mujh ko aaya nahin

yaad kar ke ye dil bhul paya nahin

laKHt-e-dil ki tarah mujh mein rahta hai wo

qatra-e-KHun sa mujh mein bahta hai wo

wo koi shai kahan main jase chhoD dun

rabta wo kahan main jise toD dun

mashq hai rang hai lutf hai KHas hai

yaad hai yaad to ek ehsas hai

yaad main ab kahan chhoD aaun tujhe

ab ye mumkin kahan bhul jaun tujhe