parda aur ismat

jo zāhir na ho vo latāfat nahīñ hai

jo pinhāñ rahe vo sadāqat nahīñ hai

ye fitrat nahīñ hai mashiyyat nahīñ hai

koī aur shai hai ye ismat nahīñ hai

sabā aur gulistāñ se dāman kashīda

navā-e-fusūñ-ḳhez aur nā-shunīda

tajallī-e-ruḳhsār aur nā-damīda

koī aur shai hai ye ismat nahīñ hai

sar-e-rahguzar chhup-chhupā kar guzarnā

ḳhud apne hī jazbāt kā ḳhuun karnā

hijāboñ meñ jiinā hijāboñ meñ marnā

koī aur shai hai ye ismat nahīñ hai

ḳhayālāt-e-paiham meñ har vaqt gum-sum

dil-e-narm-o-nāzuk pe abr-e-tavahhum

bujhā sā tabassum ghuTā sā takallum

koī aur shai hai ye ismat nahīñ hai

vo ik kāhish-e-talḳh har aan dil meñ

vo shām-o-sahar ek ḳhaljān dil meñ

umañDtā huā ek tūfān dil meñ

koī aur shai hai ye ismat nahīñ hai

nigāhoñ kī dāvat ko pāmāl karnā

mazāq-e-latāfat ko pāmāl karnā

taqāzā-e-fitrat ko pāmāl karnā

koī aur shai hai ye ismat nahīñ hai

qasam anjum-e-shab ke zauq-e-safar kī

qasam tāzgī-e-nasīm-e-sahar kī

qasam āsmānoñ ke shams-o-qamar kī

koī aur shai hai ye ismat nahīñ hai

qasam shoḳhī-e-ishq sanjogtā kī

qasam june ke azm-e-sabr-āzmā kī

qasam tāhira kī qasam ḳhālida kī

koī aur shai hai ye ismat nahīñ hai

jo zahir na ho wo latafat nahin hai

jo pinhan rahe wo sadaqat nahin hai

ye fitrat nahin hai mashiyyat nahin hai

koi aur shai hai ye ismat nahin hai

saba aur gulistan se daman kashida

nawa-e-fusun-KHez aur na-shunida

tajalli-e-ruKHsar aur na-damida

koi aur shai hai ye ismat nahin hai

sar-e-rahguzar chhup-chhupa kar guzarna

KHud apne hi jazbaat ka KHun karna

hijabon mein jina hijabon mein marna

koi aur shai hai ye ismat nahin hai

KHayalat-e-paiham mein har waqt gum-sum

dil-e-narm-o-nazuk pe abr-e-tawahhum

bujha sa tabassum ghuTa sa takallum

koi aur shai hai ye ismat nahin hai

wo ek kahish-e-talKH har aan dil mein

wo sham-o-sahar ek KHaljaan dil mein

umanDta hua ek tufan dil mein

koi aur shai hai ye ismat nahin hai

nigahon ki dawat ko pamal karna

mazaq-e-latafat ko pamal karna

taqaza-e-fitrat ko pamal karna

koi aur shai hai ye ismat nahin hai

qasam anjum-e-shab ke zauq-e-safar ki

qasam tazgi-e-nasim-e-sahar ki

qasam aasmanon ke shams-o-qamar ki

koi aur shai hai ye ismat nahin hai

qasam shoKHi-e-ishq sanjogta ki

qasam june ke azm-e-sabr-azma ki

qasam tahira ki qasam KHalida ki

koi aur shai hai ye ismat nahin hai