parinde

parinda jo hoñToñ pe par taultā thā

use baaz rakhne kī ḳhātir ik aaseb thā mere dar pe

qad us kā falak nāptā thā

nigāheñ uThāo jo chehre kī jānib

to ghuTne se aTkīñ

mujhe us ne mohre kī sūrat uThāyā

aur ik swimming-pōl meñ lā ke Daalā

vo ye chāhtā thā ki paanī meñ ye aag bhaḌkāne vaalī hasīñ machhliyāñ

mujh ko rañgoñ meñ apne jakaḌ leñ

mire ḳhuuñ meñ ye ātish rañg bhar kar

mujhe bhasm kar deñ

magar jab na ho paayā aisā

to us ne mujhe ik pahāḌī guphā meñ utārā

jahāñ sīm-o-zar kā ik ambār sā thā

us ambār meñ khul jā sim-sim kī yaad aa.ī

chālīs choroñ kī dahshat dar aa.ī

mujhe us ne qāsim kī sūrat meñ dekhā thā

us ko yaqīñ thā

chakā-chauñd zar kī mujhe dasht-e-nā-būd kī raah par Daal degī

magar jab na ho paayā aisā

to us ne mirī ik kaf-e-dasht par chāñd aur dūsrī pe

rakhā lā ke sūraj

aur ḳhud apnī Tāñgoñ se a aur v uñgliyoñ se banā kar

ajab tuntune se khaḌā thā

mire haath ne us kī v par ye chāñd aur sūraj uchhāle

chhanākā havā zor kā maiñ ne dekhā zamīñ par

ye chāñd aur sūraj shikasta the

aur hoñT ke mustaqar se

parinda fazāoñ ke āġhosh meñ tairtā thā

zamīñ āsmāñ ke qulābe milātā huā dev aaseb

qad meñ

mirī ūñchī gardan ke juute ke ham-sar huā thā

parinda jo honTon pe par taulta tha

use baz rakhne ki KHatir ek aaseb tha mere dar pe

qad us ka falak napta tha

nigahen uThao jo chehre ki jaanib

to ghuTne se aTkin

mujhe us ne mohre ki surat uThaya

aur ek swimming-pool mein la ke Dala

wo ye chahta tha ki pani mein ye aag bhaDkane wali hasin machhliyan

mujh ko rangon mein apne jakaD len

mere KHun mein ye aatish rang bhar kar

mujhe bhasm kar den

magar jab na ho paya aisa

to us ne mujhe ek pahaDi gupha mein utara

jahan sim-o-zar ka ek ambar sa tha

us ambar mein khul ja sim-sim ki yaad aai

chaalis choron ki dahshat dar aai

mujhe us ne qasim ki surat mein dekha tha

us ko yaqin tha

chaka-chaund zar ki mujhe dasht-e-na-bud ki rah par Dal degi

magar jab na ho paya aisa

to us ne meri ek kaf-e-dasht par chand aur dusri pe

rakha la ke suraj

aur KHud apni Tangon se a aur w ungliyon se bana kar

ajab tuntune se khaDa tha

mere hath ne us ki w par ye chand aur suraj uchhaale

chhanaka hawa zor ka main ne dekha zamin par

ye chand aur suraj shikasta the

aur honT ke mustaqar se

parinda fazaon ke aaghosh mein tairta tha

zamin aasman ke qulabe milata hua dew aaseb

qad mein

meri unchi gardan ke jute ke ham-sar hua tha