parinde ki fariyaad

aatā hai yaad mujh ko guzrā huā zamāna

vo baaġh kī bahāreñ vo sab kā chahchahānā

āzādiyāñ kahāñ vo ab apne ghoñsle kī

apnī ḳhushī se aanā apnī ḳhushī se jaanā

lagtī hai choT dil par aatā hai yaad jis dam

shabnam ke āñ.suoñ par kaliyoñ kā muskurānā

vo pyārī pyārī sūrat vo kāmanī sī mūrat

ābād jis ke dam se thā merā āshiyānā

aatī nahīñ sadā.eñ us kī mire qafas meñ

hotī mirī rihā.ī ai kaash mere bas meñ

kyā bad-nasīb huuñ maiñ ghar ko taras rahā huuñ

sāthī to haiñ vatan meñ maiñ qaid meñ paḌā huuñ

aa.ī bahār kaliyāñ phūloñ kī hans rahī haiñ

maiñ is añdhere ghar meñ qismat ko ro rahā huuñ

is qaid kā ilāhī dukhḌā kise sunā.ūñ

Dar hai yahīñ qafas meñ maiñ ġham se mar na jā.ūñ

jab se chaman chhuTā hai ye haal ho gayā hai

dil ġham ko khā rahā hai ġham dil ko khā rahā hai

gaanā ise samajh kar ḳhush hoñ na sunñe vaale

dukhte hue diloñ kī fariyād ye sadā hai

āzād mujh ko kar de o qaid karne vaale

maiñ be-zabāñ huuñ qaidī tū chhoḌ kar duā le!

aata hai yaad mujh ko guzra hua zamana

wo bagh ki bahaaren wo sab ka chahchahana

aazadiyan kahan wo ab apne ghonsle ki

apni KHushi se aana apni KHushi se jaana

lagti hai choT dil par aata hai yaad jis dam

shabnam ke aansuon par kaliyon ka muskurana

wo pyari pyari surat wo kaamani si murat

aabaad jis ke dam se tha mera aashiyana

aati nahin sadaen us ki mere qafas mein

hoti meri rihai ai kash mere bas mein

kya bad-nasib hun main ghar ko taras raha hun

sathi to hain watan mein main qaid mein paDa hun

aai bahaar kaliyan phulon ki hans rahi hain

main is andhere ghar mein qismat ko ro raha hun

is qaid ka ilahi dukhDa kise sunaun

Dar hai yahin qafas mein main gham se mar na jaun

jab se chaman chhuTa hai ye haal ho gaya hai

dil gham ko kha raha hai gham dil ko kha raha hai

gana ise samajh kar KHush hon na sunne wale

dukhte hue dilon ki fariyaad ye sada hai

aazad mujh ko kar de o qaid karne wale

main be-zaban hun qaidi tu chhoD kar dua le!