parindon ki duniya

ham apne diloñ kā tajassus miTā.eñ

parindoñ kī duniyā chalo dekh aa.eñ

ye chhoTe baḌe pyāre pyāre parinde

dikhāte haiñ kaise nazāre parinde

uḌeñ āsmānoñ meñ din raat ham bhī

yahī de rahe haiñ ishāre parinde

yuuñ duurī zamīñ se falak kī miTā.eñ

parindoñ kī duniyā chalo dekh aa.eñ

hameñ dekhnā hai vo rahte haiñ kaise

koī baat dil kī vo kahte haiñ kaise

jo bīmār paḌte haiñ jab bhī kabhī vo

ġham-o-dard us kā vo sahte haiñ kaise

agar ho sake un ke ham kaam aa.eñ

parindoñ kī duniyā chalo dekh aa.eñ

vo ik saath uḌnā vo mil jul ke rahnā

vo peḌoñ pe un kā phudaknā chahaknā

na dhan kī tamanna na daulat kī ḳhvāhish

na aapas meñ un kā kabhī bhī ulajhnā

vahāñ se yahī ḳhūbiyāñ DhūñD laa.eñ

parindoñ kī duniyā chalo dekh aa.eñ

zabāñ par na gaalī na shikva gila hai

ye andāz un kā bhī kitnā bhalā hai

ḳhudā kī baḌā.ī hai hoñToñ pe un ke

azal se abhī tak yahī silsila hai

suneñ aur naġhma ye ham sab bhī gaa.eñ

parindoñ kī duniyā chalo dekh aa.eñ

ḳhudāyā hameñ bhī ye ḳhūbī 'atā kar

raheñ ham bhī dil se kudūrat miTā kar

hameñ bhī kisī se na buġhz-o-hasad ho

in amrāz kī tū hamāre davā kar

tirī ne'matoñ ko na hargiz bhulā.eñ

parindoñ kī duniyā chalo dekh aa.eñ

hum apne dilon ka tajassus miTaen

parindon ki duniya chalo dekh aaen

ye chhoTe baDe pyare pyare parinde

dikhate hain kaise nazare parinde

uDen aasmanon mein din raat hum bhi

yahi de rahe hain ishaare parinde

yun duri zamin se falak ki miTaen

parindon ki duniya chalo dekh aaen

hamein dekhna hai wo rahte hain kaise

koi baat dil ki wo kahte hain kaise

jo bimar paDte hain jab bhi kabhi wo

gham-o-dard us ka wo sahte hain kaise

agar ho sake un ke hum kaam aaen

parindon ki duniya chalo dekh aaen

wo ek sath uDna wo mil jul ke rahna

wo peDon pe un ka phudakna chahakna

na dhan ki tamanna na daulat ki KHwahish

na aapas mein un ka kabhi bhi ulajhna

wahan se yahi KHubiyan DhunD laen

parindon ki duniya chalo dekh aaen

zaban par na gali na shikwa gila hai

ye andaz un ka bhi kitna bhala hai

KHuda ki baDai hai honTon pe un ke

azal se abhi tak yahi silsila hai

sunen aur naghma ye hum sab bhi gaen

parindon ki duniya chalo dekh aaen

KHudaya hamein bhi ye KHubi 'ata kar

rahen hum bhi dil se kudurat miTa kar

hamein bhi kisi se na bughz-o-hasad ho

in amraaz ki tu hamare dawa kar

teri ne'maton ko na hargiz bhulaen

parindon ki duniya chalo dekh aaen