paron mein sham Dhalti hai

kahāñ jaanā thā mujh ko

kis nagar kī ḳhaak bāloñ meñ sajānā thī

mujhe kin Tahniyoñ se dhuup chunñā thī

kahāñ ḳhema lagānā thā

mirī miTTī rah-e-sayyārgāñ kī ham-qadam niklī

mirī palkoñ pe taare jhilmilāte haiñ

badan meñ aag jaltī hai

magar paañv meñ ḳhūñ-āshām raste laḌkhaḌāte haiñ

ye kyā shīrāza-bandī hai

ye merī be-parī kis kunj se ho kar baham niklī

nazar meñ din nikaltā hai

paroñ meñ shaam Dhaltī hai

magar maiñ to lahū kī munjamid sil huuñ

badan kī kisht-e-vīrāñ meñ

ye kis kī uñgliyoñ ne umr bhar mujh ko kuredā hai

kahāñ shiryān meñ chaltā huā ye qāfila Thahrā

ki maiñ us haath kī rekhāoñ meñ rañg-e-hinā Thahrā

kahāñ jaanā thā mujh ko

kis jagah ḳhema lagānā thā

kahan jaana tha mujh ko

kis nagar ki KHak baalon mein sajaana thi

mujhe kin Tahniyon se dhup chunna thi

kahan KHema lagana tha

meri miTTi rah-e-sayyargan ki ham-qadam nikli

meri palkon pe tare jhilmilate hain

badan mein aag jalti hai

magar panw mein KHun-asham raste laDkhaDate hain

ye kya shiraaza-bandi hai

ye meri be-pari kis kunj se ho kar baham nikli

nazar mein din nikalta hai

paron mein sham Dhalti hai

magar main to lahu ki munjamid sil hun

badan ki kisht-e-viran mein

ye kis ki ungliyon ne umr bhar mujh ko kureda hai

kahan shiryan mein chalta hua ye qafila Thahra

ki main us hath ki rekhaon mein rang-e-hina Thahra

kahan jaana tha mujh ko

kis jagah KHema lagana tha