firqa-parasti ka challenge

tāqat ho kisī meñ to miTā.e mirī hastī

Daa.in hai mirā naam laqab firqa-parastī

maiñ ne baḌī chālākī se ik kaam kiyā hai

pahle hī mohabbat kā galā ghūñT diyā hai

maiñ fitne uThā detī huuñ har uThte qadam se

is desh ke TukḌe bhī hue mere hī dam se

sarmāya-parastoñ ne janam mujh ko diyā hai

maz.hab ke ta.assub ne mujhe god liyā hai

hai mulk kī taqsīm laḌakpan kī kahānī

us vaqt to bachpan thā mirā ab hai javānī

ghabrātā hai shaitāñ mirī taqrīr ke fan se

maiñ zahr ugaltī huuñ zabāñ ban ke dahan se

darkār huā jab bhī mujhe ḳhuun ziyāda

maiñ aa ga.ī oḌhe hue maz.hab kā libāda

maiñ desh kī qattāla huuñ aur sab se baḌī huuñ

bachchoñ kī bhī gardan pe chhurī ban ke chalī huuñ

golī ko sikhā detī huuñ chalne kā qarīna

maiñ chhed ke rakh detī huuñ mazlūm kā siina

har sūkhe hue hoñT se letī huuñ tarī maiñ

dam toḌne vāloñ kī uḌātī huuñ hañsī maiñ

māsūmoñ ke maañ baap kā sar maiñ ne liyā hai

bachchoñ ko yatīmī kā laqab maiñ ne diyā hai

hindū kā lahū ho ki musalmāñ kā lahū ho

matlab hai lahū se kisī insāñ kā lahū ho

mil jaa.e to maiñ kis kā lahū pī nahīñ saktī

majbūr huuñ be ḳhuun piye jī nahīñ saktī

har firqe ke logoñ kā lahū chaaT rahī huuñ

fasloñ kī tarah sab ke gale kaaT rahī huuñ

jis vaqt jahāñ chāhūñ vahāñ aag lagā duuñ

jis bastī ko chāhūñ use vīrāna banā duuñ

jis shahr ko phūñkā na makīñ the na makāñ thā

uThtā huā kuchh der agar thā to dhuāñ thā

gulshan mire hāthoñ yūñhī tārāj rahegā

maiñ zinda rahūñgī to mirā raaj rahegā

tāqat ho kisī meñ to miTā.e mirī hastī

Daa.in hai mirā naam laqab firqa-parastī

taqat ho kisi mein to miTae meri hasti

Dain hai mera nam laqab firqa-parasti

main ne baDi chaalaki se ek kaam kiya hai

pahle hi mohabbat ka gala ghunT diya hai

main fitne uTha deti hun har uThte qadam se

is desh ke TukDe bhi hue mere hi dam se

sarmaya-paraston ne janam mujh ko diya hai

mazhab ke tassub ne mujhe god liya hai

hai mulk ki taqsim laDakpan ki kahani

us waqt to bachpan tha mera ab hai jawani

ghabraata hai shaitan meri taqrir ke fan se

main zahr ugalti hun zaban ban ke dahan se

darkar hua jab bhi mujhe KHun ziyaada

main aa gai oDhe hue mazhab ka libaada

main desh ki qattala hun aur sab se baDi hun

bachchon ki bhi gardan pe chhuri ban ke chali hun

goli ko sikha deti hun chalne ka qarina

main chhed ke rakh deti hun mazlum ka sina

har sukhe hue honT se leti hun tari main

dam toDne walon ki uDati hun hansi main

masumon ke man bap ka sar main ne liya hai

bachchon ko yatimi ka laqab main ne diya hai

hindu ka lahu ho ki musalman ka lahu ho

matlab hai lahu se kisi insan ka lahu ho

mil jae to main kis ka lahu pi nahin sakti

majbur hun be KHun piye ji nahin sakti

har firqe ke logon ka lahu chaT rahi hun

faslon ki tarah sab ke gale kaT rahi hun

jis waqt jahan chahun wahan aag laga dun

jis basti ko chahun use virana bana dun

jis shahr ko phunka na makin the na makan tha

uThta hua kuchh der agar tha to dhuan tha

gulshan mere hathon yunhi taraj rahega

main zinda rahungi to mera raj rahega

taqat ho kisi mein to miTae meri hasti

Dain hai mera nam laqab firqa-parasti