parwin-shakir

bahār-e-husn javāñ-marg sūrat-e-gul-e-tar

misāl-e-ḳhār magar umr-e-dard-e-ishq darāz

vo vidyāpatī kī shā.irī kī

māsūm-o-hasīn-o-shoḳh rādhā

vo apne ḳhayāl kā kanhaiyā

in shahroñ meñ DhūñDne ga.ī thī

dastūr thā jin kā sañg-bārī

vo 'faiz'-o-'firāq' ziyāda

taqdīs-e-badan kī naġhma-ḳhvāñ thī

tahzīb-e-badan kī rāz-dāñ thī

gulnār badan kī tahniyat meñ

gulnār laboñ se gul-fishāñ thī

lab-āshnā lab ġhazal ke misre

jism-āshnā jism nazm-paikar

lafzoñ kī hatheliyāñ hinā.ī

tashbīhoñ kī uñgliyāñ gulābī

sarsabz ḳhayāl kā gulistāñ

mub.ham se kuchh āñsuoñ ke chashme

aahoñ kī vo halkī sī havā.eñ

sad-barg havā meñ muntashir the

titlī thī ki raqs kar rahī thī

aur dard ke bādaloñ se chhan kar

naġhmoñ kī phuvāre paḌ rahī thī

pur-shor munāfiqat ke bāzār

afvāheñ faroḳht kar rahe the

vo apnī shikasta shaḳhsiyat ko

ash.ār kī chādaroñ ke andar

is tarah sameTne lagī thī

ehsās meñ aa rahī thī vus.at

nazroñ kā ufuq badal rahā thā

aur dard-e-jahān-e-ādamiyat

TuuTe hue dil meñ Dhal rahā thā

is ālam-e-kaif-o-kam meñ ik din

ik hādse kā shikār ho kar

jab ḳhuuñ kā kafan pahan liyā to

uḌtīñ salībeñ nauha-ḳhvāñ thiiñ

ḳhāmosh thā karb-e-ḳhud-kalāmī

ab kuchh nahīñ rah gayā hai baaqī

baaqī hai suḳhan kī dil-navāzī

2

jannat meñ hai jashn-e-nau kā sāmāñ

mahfil meñ 'majāz'-o-'bā.iran' haiñ

maujūd haiñ 'keats' aur 'shailī'

ye marg-e-javāñ ke saare āshiq

ḳhush haiñ ki zamīn-e-pāk se ik

nau-marg-e-bahār aa ga.ī hai

lipTī huī ḳhaak kī hai ḳhushbū

aur sāya-fagan sahāb-e-rahmat

bahaar-e-husn jawan-marg surat-e-gul-e-tar

misal-e-KHar magar umr-e-dard-e-ishq daraaz

wo widyapati ki shairi ki

masum-o-hasin-o-shoKH radha

wo apne KHayal ka kanhaiya

in shahron mein DhunDne gai thi

dastur tha jin ka sang-bari

wo 'faiz'-o-'firaq' ziyaada

taqdis-e-badan ki naghma-KHwan thi

tahzib-e-badan ki raaz-dan thi

gulnar badan ki tahniyat mein

gulnar labon se gul-fishan thi

lab-ashna lab ghazal ke misre

jism-ashna jism nazm-paikar

lafzon ki hatheliyan hinai

tashbihon ki ungliyan gulabi

sarsabz KHayal ka gulistan

mubham se kuchh aansuon ke chashme

aahon ki wo halki si hawaen

sad-barg hawa mein muntashir the

titli thi ki raqs kar rahi thi

aur dard ke baadalon se chhan kar

naghmon ki phuware paD rahi thi

pur-shor munafiqat ke bazar

afwahen faroKHt kar rahe the

wo apni shikasta shaKHsiyat ko

ashaar ki chadaron ke andar

is tarah sameTne lagi thi

ehsas mein aa rahi thi wusat

nazron ka ufuq badal raha tha

aur dard-e-jahan-e-adamiyat

TuTe hue dil mein Dhal raha tha

is aalam-e-kaif-o-kam mein ek din

ek hadse ka shikar ho kar

jab KHun ka kafan pahan liya to

uDtin saliben nauha-KHwan thin

KHamosh tha karb-e-KHud-kalami

ab kuchh nahin rah gaya hai baqi

baqi hai suKHan ki dil-nawazi

2

jannat mein hai jashn-e-nau ka saman

mahfil mein 'majaz'-o-'bairan' hain

maujud hain 'keats' aur 'shaili'

ye marg-e-jawan ke sare aashiq

KHush hain ki zamin-e-pak se ek

nau-marg-e-bahaar aa gai hai

lipTi hui KHak ki hai KHushbu

aur saya-fagan sahab-e-rahmat